১০ ডিচেম্বৰত মেক্সিকান ছিনেটে এখন ডাঙৰ বিধেয়ক গৃহীত কৰে য’ত চীন, ভাৰত, দক্ষিণ কোৰিয়া, থাইলেণ্ড, ইণ্ডোনেছিয়া আদি এছিয়ান দেশসমূহৰ ওপৰত ৫০% পৰ্যন্ত শুল্ক আৰোপ কৰা হ’ব। এইয়া ২০২৬ চনৰ পৰা কাৰ্যকৰী হ’বলগীয়া ট্ৰাম্পৰ শুল্কৰ সৈতে একেই।
আমেৰিকাৰ ৰাষ্ট্ৰপতি ড’নাল্ড ট্ৰাম্প প্ৰশাসনৰ সুৰক্ষাবাদী নীতি অনুসৰণ কৰি মেক্সিকোৱে এই পদক্ষেপ গ্ৰহণ কৰিছে। য’ত ট্ৰাম্পেও এছিয়াৰ দেশসমূহৰ ওপৰত গধুৰ শুল্ক আৰোপ কৰিছে।
এছিয়ান দেশৰ প্ৰায় ১৪০০ সামগ্ৰীৰ ওপৰত শুল্ক আৰোপ বা বৃদ্ধি কৰা হ’ব। মেক্সিকোলৈ ৰপ্তানি কৰিলে অটোম’বাইল, অটো পাৰ্টছ, কাপোৰ, জোতা, প্লাষ্টিক, ষ্টীল, আচবাব, খেলনা, এলুমিনিয়াম, আৰু কাঁচৰ সামগ্ৰীৰ দাম বৃদ্ধি পাব। এইক্ষেত্ৰত মেক্সিকোৰ সৈতে মুক্ত বাণিজ্য চুক্তি (এফটিএ) নথকা দেশসমূহ বিশেষভাৱে প্ৰভাৱিত হ’ব।
মেক্সিকান সংসদত এই বিধেয়কখন দ্ৰুতগতিত গৃহীত হয়। ১০ ডিচেম্বৰত নিম্ন সদনে ইয়াক অনুমোদন জনোৱাৰ বিপৰীতে ছিনেটে ৭৬-৫ ভোটত বিধেয়কখন গৃহীত কৰে। ৰাষ্ট্ৰপতি শ্বেইনবামে ২০২৫ চনৰ ছেপ্টেম্বৰ মাহত এই প্ৰস্তাৱ দিছিল, আৰু তেওঁ অতি সোনকালে ইয়াত স্বাক্ষৰ কৰাৰ সম্ভাৱনা আছে।
মেক্সিকো চীনৰ পৰা আঁতৰি থাকিবলৈ হেঁচা প্ৰয়োগ কৰিছে ড’নাল্ড ট্ৰাম্পে। ২০২৬ চনত আমেৰিকা-মেক্সিকো-কানাডা বাণিজ্য চুক্তি (USMCA) পুনৰীক্ষণ হ’ব আৰু আমেৰিকাই মেক্সিকোক চীনৰ “বেকড’ৰ” প্ৰৱেশ বিন্দু হিচাপে লয়। বিশেষজ্ঞসকলে ইয়াৰ কাৰণ ৱাশ্বিংটনক সন্তুষ্ট কৰাৰ প্ৰয়াস বুলি কয়। আমেৰিকাৰ দৰেই মেক্সিকোৱেও সুৰক্ষাবাদৰ দিশে আগবাঢ়িছে। ইয়াৰ ফলত স্থানীয় কাৰখানাসমূহ শক্তিশালী হ’ব আৰু সম্ভাৱনাময়ভাৱে ৩ লাখৰো অধিক চাকৰিৰ ৰাহি হ’ব। অৱশ্যে আমদানিকৃত অংশ অধিক ব্যয়বহুল হ’ব, যাৰ ফলত মুদ্ৰাস্ফীতি বৃদ্ধি হ’ব পাৰে। মেক্সিকান ব্যৱসায়িক গোটসমূহে ইয়াৰ বিৰোধিতা কৰিছে।
খবৰ অনুসৰি ভাৰত আৰু মেক্সিকোৰ মাজত যোৱা কিছু বছৰত বাণিজ্য বৃদ্ধি পাইছে। ২০২২ চনত দুয়োখন দেশৰ মাজত বাণিজ্য ১১.৪ বিলিয়ন ডলাৰ হয় যদিও ২০২৩ চনত ই ১০.৬ বিলিয়ন ডলাৰলৈ হ্ৰাস পায়।২০২৪ চনত বাণিজ্য পুনৰ উত্থান ঘটি ১১.৭ বিলিয়ন ডলাৰ হয়, যিটো সৰ্বকালৰ সৰ্বোচ্চ। মেক্সিকোৰ সৈতেও ভাৰতৰ বাণিজ্যিক উদ্বৃত্ত উল্লেখযোগ্য। ২০২৪ চনত ভাৰতে মেক্সিকোলৈ ৮.৯ বিলিয়ন ডলাৰৰ সামগ্ৰী ৰপ্তানি কৰিছিল, আনহাতে আমদানি কৰিছিল মাত্ৰ ২.৮ বিলিয়ন ডলাৰ।
