ইৰাণৰ সশস্ত্ৰ বাহিনীৰ এগৰাকী মুখপাত্ৰই আমেৰিকাৰ ৰাষ্ট্ৰপতি ড’নাল্ড ট্ৰাম্পক দেশখনৰ সৰ্বোচ্চ নেতা আয়াতুল্লাহ আলী খামেনেইৰ বিৰুদ্ধে কোনো ধৰণৰ ব্যৱস্থা গ্ৰহণ নকৰিবলৈ সকীয়াই দিয়ে। ট্ৰাম্পে খামেনেইৰ প্ৰায় ৪০ বছৰীয়া শাসনৰ অন্ত পেলাবলৈ আহ্বান জনোৱাৰ কিছুদিন পিছতে এই সতৰ্কবাণী দিয়া হৈছে।
এক সাক্ষাৎকাৰত ট্ৰাম্পে খামেনেইক এগৰাকী “ৰোগী ব্যক্তি” বুলি অভিহিত কৰি কয় যে তেওঁ “নিজৰ দেশ সঠিকভাৱে চলাব লাগে আৰু নীৰিহ জনতাৰ ওপৰত হত্যা কৰা বন্ধ কৰিব লাগে”। ইৰাণত নতুন নেতৃত্ব বিচাৰি উলিওৱাৰ সময় আহি পৰিছে বুলি ট্ৰাম্পে কয়।
ট্ৰাম্পৰ মন্তব্যৰ পিছতে জেনেৰেল আবোলফাজল শ্বেখাৰ্চিয়ে এই সতৰ্কবাণী জাৰি কৰিছে। ইৰাণৰ অৱনতি ঘটা অৰ্থনীতিৰ বাবে ২৮ ডিচেম্বৰৰ পৰা আৰম্ভ হোৱা প্ৰতিবাদৰ ওপৰত কৰ্তৃপক্ষই হিংসাত্মক দমন চলোৱাৰ পিছৰে পৰা আমেৰিকা আৰু ইৰাণৰ মাজত উত্তেজনা উচ্চ পৰ্যায়ত আছে।
ইৰাণৰ ৰাষ্ট্ৰপতি মাছুদ পেজেছকিয়ানে শেহতীয়াকৈ কয় যে, ইৰাণৰ জনসাধাৰণে যদি তেওঁলোকৰ জীৱনত অসুবিধাৰ সন্মুখীন হয়, তেন্তে ইয়াৰ কাৰণ হৈছে আমেৰিকা চৰকাৰ আৰু ইয়াৰ মিত্ৰশক্তিৰ দীৰ্ঘদিনীয়া শত্ৰুতা আৰু অমানৱীয় নিষেধাজ্ঞা। ইৰাণৰ সৰ্বোচ্চ নেতাৰ বিৰুদ্ধে যিকোনো আক্ৰমণ ইৰাণৰ বিৰুদ্ধে পূৰ্ণাংগ যুদ্ধৰ সমান হ’ব।
মানৱ অধিকাৰ কৰ্মীসকলে মঙলবাৰে প্ৰকাশ কৰা অনুসৰি দেশজুৰি চলি থকা প্ৰতিবাদৰ সৈতে জড়িত প্ৰতিবাদকাৰীৰ বিৰুদ্ধে ইৰাণে চলোৱা দমন কাৰ্যসূচীত কমেও ৪০২৯ জন লোকৰ মৃত্যু হৈছে। আমেৰিকা যুক্তৰাষ্ট্ৰৰ হিউমেন ৰাইটছ এক্টিভিষ্ট নিউজ এজেন্সীয়ে এই তথ্য প্ৰকাশ কৰি কয় যে এই দমনৰ সময়ত ২৬ হাজাৰৰো অধিক লোকক আটক কৰি ৰখা হৈছে।
মানৱ অধিকাৰ কৰ্মী নিউজ এজেন্সীৰ তথ্য অনুসৰি নিহতসকলৰ ভিতৰত আছে ৩৭৮৬ জন প্ৰতিবাদকাৰী, ১৮০ জন নিৰাপত্তাৰক্ষী, আনহাতে ২৮ জন শিশু আৰু কোনো প্ৰতিবাদত অংশগ্ৰহণ নকৰা ৩৫ জন লোকো এই কাৰ্য্যত নিহত হয়।
