শিলচৰৰ ডায়গন’ষ্টিক চেন্টাৰত সংঘটিত হৈছে এক চাঞ্চল্যকৰ ঘটনা। ৰোগীৰ আলট্ৰাচাউণ্ড ৰিপোৰ্টত ধৰা পৰে 13.7 MM gallbladder stone, পিছে চেন্নাইৰ এপ’ল’ হাস্পতাল পোৱাৰ লগে লগে নোহোৱা হ’ল ষ্ট’ন।
চেন্নাইৰ পৰা উভতি আহি ডায়গন’ষ্টিক চেন্টাৰসহ ৰেডিঅ’লজিষ্টৰ বিৰুদ্ধে গোচৰ ভুক্তভোগী পৰিয়ালৰ। ভুক্তভোগী পৰিয়ালটোৱে ডায়গন’ষ্টিক চেন্টাৰৰ কৰ্তৃপক্ষৰ বিৰুদ্ধেও অভিযোগ উত্থাপন কৰে।
কাছাৰৰ সোনাবাড়িঘাটৰ এটা পৰিয়ালে ভুল ৰিপোৰ্ট দিয়াৰ অভিযোগ উত্থাপিত কৰি শিলচৰ মেহেৰপুৰস্থিত শিলচৰ হেল্থ কেয়াৰ নামৰ এখন ডায়গন’ষ্টিক চেন্টাৰৰ বিৰুদ্ধে শিলচৰ সদৰ থানাত এক গোচৰ ৰুজু কৰে।
পৰিয়ালৰ অভিযোগ অনুসৰি, ৰেজিয়া বেগম নামৰ এগৰাকী ৰোগীৰ শিলচৰ হেল্থ কেয়াৰত আলট্ৰাচাউণ্ড কৰা হৈছিল। আলট্ৰাচাউণ্ড ৰিপোৰ্টত ৰোগীজনৰ gallbladder ত 13.7 MM ষ্ট’ন ধৰা পৰিছিল।
ষ্ট’ন ধৰা পৰাৰ পাছতেই ৰোগীজনক তাৎক্ষণিকভাৱে অপাৰেচনৰ নিৰ্দেশ দিছিল চিকিৎসকে। পিছে শিলচৰত অপাৰেচন নকৰাই ৰোগীৰ পৰিয়াল যায় চেন্নাইৰ এপ’ল’ হাস্পতালত। এপ’ল’ হাস্পতালত যোৱাৰ পাছত হাস্পতালৰ কৰ্তব্যৰত চিকিৎসকে ৰোগীৰ পুনৰ টেষ্ট কৰে।
কিন্তু চেন্নাইৰ এপ’ল’ হাস্পতালত কৰা টেষ্টত ৰোগীৰ gallbladder ত কোনো ষ্ট’ন ধৰা নপৰে। চিকিৎসকে পৰিয়ালক কয় যে, ৰোগীৰ gallbladder ত কোনো stone নাই, তেওঁক ঘৰলৈ লৈ যাব পাৰে। এপ’ল’ হাস্পতালৰ চিকিৎসকৰ এনে কথা শুনি ৰোগীৰ পৰিয়ালে ৰোগীক লৈ শিলচৰলৈ উভতি আহে।
শিলচৰত উপস্থিত হৈ তেওঁলোকে পোনেপোনে শিলচৰ সদৰ আৰক্ষী চকীত উপস্থিত হৈ শিলচৰ হেল্থ কেয়াৰ সহ আলট্ৰাচাউণ্ড কৰা চিকিৎসকৰ বিৰুদ্ধে ৰুজু কৰে এক গোচৰ। ভুল ৰিপৰ্ট দিয়াৰ অভিযোগ উত্থাপিত কৰি গোচৰ ৰুজু কৰে পৰিয়ালটোৱে।
ইপিনে এই সমগ্ৰ অভিযোগ খণ্ডন কৰি শিলচৰ হেল্থ কেয়াৰ নামৰ ডায়গন’ষ্টিক চেন্টাৰটোৰ ৰেডিওলজিস্টে কয় যে, তেওঁলোকৰ ৰিপৰ্ট ভুল নহয়। চেন্নাইৰ এপ’ল’ হাস্পতালত ৰোগীৰ জনৰ চিটি স্কেন কৰা হৈছিল আৰু চিটি স্কেনত gallbladder ষ্ট’ন ধৰা নপৰে । চিটি স্কেন আৰু আলট্ৰাচাউণ্ড দুটা বেলেগ বেলেগ বিষয় বুলি কয় ডায়গন’ষ্টিক চেন্টাৰৰ ৰেডিঅ’লজিষ্ট গৰাকীয়ে।
