উত্তৰ প্ৰদেশৰ বাৰাণসীস্থিত কাশী হিন্দু বিশ্ববিদ্যালয়ৰ মেডিকেল ইনষ্টিটিউট এণ্ড ট্ৰমা চেণ্টাৰত কৰ্মচাৰীসকলৰ অসুবিধা আৰু আচৰণৰ বিৰুদ্ধে ছাত্ৰ-ছাত্ৰীৰ প্ৰতিবাদ অব্যাহত আছে।
ইফালে বিশ্ববিদ্যালয়খনৰ ছাত্ৰ-ছাত্ৰীসকলে বিষয়া-কৰ্মচাৰীসকলক বুদ্ধি-শুদ্ধি যজ্ঞ সম্পন্ন কৰি বিশ্ববিদ্যালয়খনৰ চিকিৎসা প্ৰতিষ্ঠানে নিজৰ ব্যৱস্থা উন্নত কৰি সুদূৰৰ পৰা অহা ৰোগীসকলক উন্নত সা-সুবিধা প্ৰদান কৰিবলৈ দাবী জনায়।
শিক্ষার্থীসকলে প্রতিষ্ঠানখনৰ গাফিলতিৰ বিষয়ে অহৰহ মেনেজমেণ্টৰ ওচৰত অভিযোগ কৰি আছিল যদিও কোনো ব্যৱস্থা লোৱা হোৱা নাছিল৷ সেয়ে এতিয়া ছাত্ৰ-ছাত্ৰীসকলে এই কৌশল গ্ৰহণ কৰিছে। শীঘ্ৰে দাবী পূৰণ নকৰিলে ভৱিষ্যতে তীব্ৰ আন্দোলনৰো হুংকাৰ দিয়ে ছাত্ৰ-ছাত্ৰীসকলে।
ঘটনা সন্দৰ্ভত বি এইচ ইউৰ গৱেষক ছাত্ৰ শিৱম সোণকৰে কয় যে মদন মোহন মালৱিয়াৰ নীতি আৰু ভীমৰাও আম্বেদকাৰৰ মতাদৰ্শৰ আধাৰত ছাত্ৰ-ছাত্ৰীসকলে শান্তিপূৰ্ণভাৱে কাশী হিন্দু বিশ্ববিদ্যালয়ৰ চিকিৎসা প্ৰতিষ্ঠানত হোৱা গাফিলতিৰ বিৰুদ্ধে মাত মাতিছে। তেওঁলোকৰ দাবী এইয়ে যে ইনষ্টিটিউটখনত ৰোগীসকলৰ বাবে উপলব্ধ সকলো সা-সুবিধা উন্নত কৰা হওক। তদন্তৰ পৰা আৰম্ভ কৰি ৰোগীৰ চিকিৎসালৈকে সকলো সা-সুবিধা উন্নীত কৰিব লাগিব। সেইবাবেই এই বুদ্ধি-শুদ্ধ যজ্ঞৰ আয়োজন কৰা হৈছে।
একে সময়তে বাৰাণসীত সমাজবাদী পাৰ্টীয়ে বি এইচ ইউ হাস্পতাল আৰু ট্ৰমা চেণ্টাৰৰ বিৰুদ্ধে দুৰ্নীতিৰো অভিযোগ উত্থাপন কৰে। এই সন্দৰ্ভত সমাজবাদী পাৰ্টিৰ নেতাসকলে প্ৰতিষ্ঠানটোৰ প্ৰতিনিধি দললৈ এখন স্মাৰক পত্ৰ দাখিল কৰে। চিকিৎসালয়খনত অবিৰত দুৰ্নীতি আৰু মানুহক মাৰপিট কৰাৰ অভিযোগো উত্থাপন হৈছে। প্ৰশাসনক গুণ্ডাগিৰিৰ অভিযোগ উত্থাপন কৰি তেওঁলোকে এই বিষয়ত শীঘ্ৰে তদন্তৰ দাবী জনাই ব্যৱস্থা গ্ৰহণৰ বাবে স্মাৰক পত্ৰ দাখিল কৰাৰ লগতে এই বিষয়ত ব্যৱস্থা গ্ৰহণ নকৰিলে সমাজবাদী পাৰ্টিয়ে প্ৰতিবাদ কৰিবলৈ বাধ্য হ’ব বুলিও ঘোষণা কৰে।
