ইন্দোৰৰ ৰাজা ৰঘুবংশীৰ হত্যাকাণ্ডত বৃহৎ সফলতা লাভ কৰিছে মেঘালয় আৰক্ষীয়ে। পত্নী সোণমকে ধৰি ইতিমধ্যে তিনিজন অভিযুক্তক গ্ৰেপ্তাৰ কৰিছে আৰক্ষীয়ে। মেঘালয়ৰ ডিজিপি আই নোংৰাঙে কয় যে ৰাজা ৰঘুবংশীক হত্যা কৰিবলৈ হত্যাকাৰী নিয়োগ কৰা হৈছিল।
ডিজিপিয়ে লগতে কয় যে, ইতিমধ্যে এজন অভিযুক্ত উত্তৰ প্ৰদেশৰ পৰা ধৰা পৰিছে, আনহাতে আন দুজনক ইন্দোৰৰ পৰা এছআইটিয়ে ধৰা পেলাইছে।
৭ জুনত এজন ট্যুৰ গাইডে জনাইছিল যে ইন্দোৰৰ হানিমুন দম্পতী ৰাজা ৰঘুবংশী আৰু তেওঁৰ পত্নী সোণমৰ সৈতে মেঘালয়ৰ সোহৰা অঞ্চলৰ পৰা নিৰুদ্দেশ হোৱা দিনটোত আন তিনিজন লোকো উপস্থিত আছিল। এজন বিষয়াই নিশ্চিত কৰে যে গাইডজনে এই তথ্য আৰক্ষীক দিছিল।
মেঘালয়ৰ মুখ্যমন্ত্ৰী কনৰাড কে চাংমাই টুইটযোগে কয় যে ইন্দোৰ ৰাজা হত্যাকাণ্ডৰ গোচৰত মেঘালয় আৰক্ষীয়ে বৃহৎ সফলতা লাভ কৰিছে। এই ক্ষেত্ৰত মধ্যপ্ৰদেশৰ পৰা তিনিজন আক্ৰমণকাৰীক গ্ৰেপ্তাৰ কৰা হৈছে, মহিলাগৰাকীয়ে আত্মসমৰ্পণ কৰিছে আৰু আন এজন আক্ৰমণকাৰীক গ্ৰেপ্তাৰ কৰাৰ অভিযান বৰ্তমানেও অব্যাহত আছে।
এই ইন্দোৰ দম্পতীয়ে ২০২৫ চনৰ ১১ মে’ত বিবাহৰ পিছত শ্বিলঙলৈ হানিমুনলৈ গৈছিল।২০ মে’ত মেঘালয়ত উপস্থিত হৈছিল আৰু ২৩ মে’ত শেষবাৰৰ বাবে পৰিয়ালটোৰ সৈতে কথা পাতিছিল। ইয়াৰ পিছত দুয়োৰে ফোন চুইচ অফ হৈ গ’ল।
সোহৰিম অঞ্চলত পৰিত্যক্ত অৱস্থাত উদ্ধাৰ হৈছে দম্পতীহালৰ ভাড়াতীয়া স্কুটি। তাৰ পাছত ২ জুনত ৱেই ছ’ডং জলপ্ৰপাতৰ সমীপৰ এটা খাৱৈত উদ্ধাৰ হয় ৰাজা ৰঘুবংশীৰ মৃতদেহ। আৰক্ষীয়ে হত্যাৰ গোচৰ ৰুজু কৰে। পত্নী সোণমৰ কোনো সন্ধান পোৱা নাযায়। যাৰ বাবে পৰিয়ালটোৱে অপহৰণ বা সৰবৰাহৰ সন্দেহ কৰিবলৈ আৰম্ভ কৰে।
ইন্দোৰৰ পৰিবহণ ব্যৱসায়ী ৰাজা ৰঘুবংশীয়ে যোৱা ১১ মে’ত সোণম ৰঘুবংশীৰ সৈতে বিবাহপাশত আবদ্ধ হয়।ৰাজাৰ মৃতদেহ উদ্ধাৰৰ পিছৰে পৰা আৰক্ষীয়ে সোণমক বিচাৰি আছিল।
