আই পি এলৰ সৰ্বকনিষ্ঠ কোটিপতি বৈভৱ সূৰ্যবংশীয়ে নিজৰ চমকপ্ৰদ প্ৰদৰ্শনেৰে পুনৰবাৰ দৃষ্টি কাঢ়িছে লাখ-লাখ ক্ৰিকেট অনুৰাগীৰ। ১৯ বছৰ অনুৰ্ধ্ব এছিয়া কাপত টিম ইণ্ডিয়াৰ হৈ বৈভৱে বিস্ফোৰক প্ৰদৰ্শন কৰি ৭৬ ৰানৰ অপৰাজিত ইনিংছ খেলে।
বৈভৱৰ উন্নত প্ৰদৰ্শনৰ ভিত্তিতে ভাৰতে ইউ এ ইক ১০ উইকেটত পৰাস্ত কৰিবলৈ সক্ষম হয়। দৰ্শনীয় ইনিংছ খেলাৰ পিছতো কিন্তু বৈভৱ সূৰ্যবংশীয়ে লাভ নকৰিলে মেচখনৰ শ্ৰেষ্ঠ খেলুৱৈৰ সন্মান। আয়ুষ মাত্ৰে নামৰ আনজন অপেনাৰে লাভ কৰে এই খিতাপ।
বৈভৱ আৰু আয়ুষে ভাৰতৰ হৈ ইনিংছ মুকলি কৰিবলৈ আহিছিল। বৈভৱে নিজৰ ইনিংছত ৬টা ছয় আৰু ৩টা চাৰিৰ সহায়ত ৪৬টা বলত অপৰাজিত ৭৬ ৰান সংগ্ৰহ কৰে। ইফালে আয়ুষে ৫১টা বলৰ মুখামুখি হৈ অপৰাজিত ৬৭ ৰান সংগ্ৰহ কৰে। তেওঁৰ বেটেৰে আহে ৪টা চাৰি আৰু ৪টা ছয়। অৰ্ধশতকীয় ইনিংছৰ লগতে এটা উইকেট দখল কৰাৰ বাবে আয়ুষক মেচৰ শ্ৰেষ্ঠ খেলুৱৈ হিচাপে নিৰ্বাচিত কৰা হয়।
মেচখনত প্ৰথমে বেট ধৰা ইউ এ ই দলে ৪৪ অভাৰত ১৩৭ ৰান সংগ্ৰহ কৰি অলআউট হয়। ইয়াৰ প্ৰত্যুত্তৰত ভাৰতে এটাও উইকেট নেহেৰুৱাকৈ ১৪৩ ৰান সংগ্ৰহ কৰি মেচখনত জয়লাভ কৰে। এই খেলখনত ভাৰতে মাত্ৰ ১৬.১ অভাৰতে জয়লাভ কৰিবলৈ সক্ষম হয়।
উল্লেখ্য যে, আই পি এল ২০২৫ৰ মেগা নিলামৰ পিছত লাইমলাইটলৈ আহিছিল বৈভৱ সূৰ্যবংশী। ৰাজস্থান ৰয়েলছে ১.১০ কোটি টকাত ক্ৰয় কৰিছিল বৈভৱক। বেছ প্ৰাইজতকৈ অধিক মূল্যত বিক্ৰী হৈছিল ১৩ বছৰীয়া ক্ৰিকেটাৰগৰাকী। তেওঁ আই পি এলৰ আটাইতকৈ কম বয়সীয়া কোটিপতি। বৈভৱৰ বয়স মাত্ৰ ১৩ বছৰ।
