১০ হাজাৰ বছৰৰ পিছত প্ৰথমবাৰৰ বাবে ২৩ নৱেম্বৰত ইথিওপিয়াৰ হাইলি গুব্বি অঞ্চলত আগ্নেয়গিৰি বিস্ফোৰণ হয়। যাৰ ফলত ইথিওপিয়াৰ আকাশত ক’লা-ধোঁৱা আৰু চালফাৰ-ডাই-অক্সাইডৰ ডাঠ তৰপে আগুৰি ধৰে। এই বৃহৎ বিস্ফোৰণৰ কিছু মিনিটৰ ভিতৰতে ডাঠ, ক’লা আৰু অতি মিহি কণিকাৰ ধোঁৱা হাজাৰ হাজাৰ ফুট আকাশলৈ উঠি আহে।
চৌদি আৰৱৰ পৰা মাত্ৰ ৪০০ কিলোমিটাৰ দূৰত্বত আৰব উপদ্বীপৰ ঠিক সমীপতে এই আগ্নেয়গিৰিৰ হঠাতে বিস্ফোৰণ ঘটে। এই ধোঁৱাই পোনে পোনে য়েমেন, ওমান আৰু আৰব সাগৰৰ ফালে উৰি যায়। এক প্ৰতিবেদনৰ মতে, ফ্ৰান্সৰ টুলুজ আগ্নেয়গিৰিৰ এছ এডভাইজাৰী চেণ্টাৰে প্ৰথমে পুৱা ৮.৩০ বজাত এই কথা নিশ্চিত কৰে। কিন্তু আচল চিন্তা ভাৰতৰ বাবে, কাৰণ এই ছাই এতিয়া ভাৰতৰ আকাশতো প্ৰভাৱ বুলি আশংকা কৰা হৈছে।
ইথিওপিয়াত বিস্ফোৰণ ঘটা আগ্নেয়গিৰিৰ ফলত ভাৰতীয় এক বিমান সংস্থাই নিৰাপত্তাজনিত কাৰণত আবুধাবিলৈ যোৱা বিমান মাজ বাটতেই ডাইভাৰ্ট কৰিবলগীয়া হৈছিল। ডিজিচিএই সকলো বিমান সংস্থাক কঠোৰ পৰামৰ্শ জাৰি কৰি স্পষ্টভাৱে উল্লেখ কৰিছে যে এই আগ্নেয়গিৰিৰ ফলত বিমান চলাচল কঠোৰভাৱে এৰাই চলিব লাগে।
ডিজিচিএই বিমান সংস্থাসমূহক তেওঁলোকৰ বিমানৰ পৰিকল্পনা, পথ, আৰু উচ্চতাৰ সিদ্ধান্তসমূহ নিৰন্তৰভাৱে আপডেট কৰা আগ্নেয়গিৰিৰ এছ এডভাইজাৰীৰ ওপৰত ভিত্তি কৰি ল’বলৈও নিৰ্দেশ দিছে। পাইলট, ডিচপেচ টিম, আৰু কেবিন ক্ৰুকো আগ্নেয়গিৰিৰ ছাইৰ লগত জড়িত বিপদৰ বিষয়ে অৱগত কৰা হৈছে আৰু তেওঁলোক সম্পূৰ্ণৰূপে সাজু হৈ আছে। উৰণৰ সময়ত ইঞ্জিনৰ শব্দৰ যিকোনো পৰিৱৰ্তন, কাৰ্যক্ষমতা হ্ৰাস, বা ধোঁৱা বা কেবিনত অস্বাভাৱিক দুৰ্গন্ধৰ বিষয়ে জনাবলৈ নিৰ্দেশ দিয়া হৈছে।
বিমানবন্দৰ পৰ্যায়তো অতিৰিক্ত নিৰাপত্তা ব্যৱস্থা গ্ৰহণ কৰা হৈছে। ৰাণৱে, টেক্সিৱে, আৰু আকাশমাৰ্গৰ বিশেষ পৰিদৰ্শনৰ নিৰ্দেশ দিয়া হৈছে য’ত ছাই বিমানবন্দৰত পোৱাৰ সম্ভাৱনা আছে। প্ৰয়োজন হ’লে অভিযান বন্ধ বা সীমিত কৰিবলৈ পৰামৰ্শ দিয়া হৈছে। বিমান সংস্থাসমূহক উপগ্ৰহৰ ছবি, বতৰৰ তথ্য, NOTAM, ASHTAM, আৰু Volcanic Ash Advisories 24/7 নিৰীক্ষণ কৰিবলৈও নিৰ্দেশ দিয়া হৈছে, কিয়নো বতাহত ছাইৰ গতিবেগে যিকোনো সময়তে দিশ সলনি কৰিব পাৰে।
