লোকসভা আৰু ৰাজ্যসভাত সংখ্যাগৰিষ্ঠতা আৰু ৰাষ্ট্ৰপতি দ্ৰৌপদী মুৰ্মুৰ সন্মতি লাভ কৰাৰ পিছত ৱাকফ সংশোধনী বিধেয়ক ২০২৫ য়ে অনুমোদন লাভ কৰি আইনত পৰিণত হয়। অৱশ্যে তামিলাগা ভেত্ৰী কাঝাগম (টিভিকে) দলৰ সভাপতি তথা অভিনেতা থালাপথী বিজয়ে এই আইনখনক সমৰ্থন নকৰে। এনে পৰিস্থিতিত অভিনেতাজনে এই আইনক প্ৰত্যাহ্বান জনোৱাৰ সিদ্ধান্ত লৈছে।
ইতিমধ্যে ৱাকফ সংশোধনী আইন ২০২৫ক প্ৰত্যাহ্বান জনাই উচ্চতম ন্যায়ালয়ত কেইবাখনো আবেদন দাখিল কৰা হৈছে। কিয়নো এই আইনখনে মুছলমান সম্প্ৰদায়ৰ বিৰুদ্ধে বৈষম্যমূলক ব্যৱহাৰ কৰে আৰু তেওঁলোকৰ মৌলিক অধিকাৰ খৰ্ব কৰে বুলি দাবী কৰা হৈছে।
ইফালে এতিয়া দক্ষিণৰ অভিনেতা থালাপথী বিজয়েও ৱাকফ সংশোধনী আইন ২০২৫ক প্ৰত্যাহ্বান জনাইছে। খবৰ অনুসৰি অভিনেতাজনে এই আইনৰ বিৰুদ্ধে উচ্চতম ন্যায়ালয়ত আবেদন দাখিল কৰিছে।
ইয়াৰ পূৰ্বে সংবাদ মাধ্যমৰ তথ্য অনুসৰি, থালাপথী বিজয়ে এক বিবৃতিত ৱাকফ (সংশোধনী) আইনক ‘মুছলমান বিৰোধী’ বুলি অভিহিত কৰিছিল। তেওঁ কয় যে, সংসদৰ নিম্ন সদনত গৃহীত হোৱা এই বিধেয়কখনে পুনৰবাৰ সংবিধানৰ মৰ্যাদা আৰু ধৰ্মনিৰপেক্ষ ভাৰতীয় গণতন্ত্ৰৰ মৌলিক নীতিৰ ওপৰত প্ৰশ্নবোধক চিহ্ন স্থাপন কৰিছে।
থালাপথী বিজয়ে লগতে কৈছে যে, সকলো গণতান্ত্ৰিক শক্তিৰ কণ্ঠৰ কথা মনত ৰাখি এই গণতন্ত্ৰ বিৰোধী বিধেয়কখন শীঘ্ৰে প্ৰত্যাহাৰ কৰিব লাগে। যদি বিজেপি নেতৃত্বাধীন কেন্দ্ৰীয় চৰকাৰে তেনে নকৰে, তেন্তে মুছলমান ভাইসকলে ৱাকফ অধিকাৰৰ বাবে আইনী সংগ্ৰামত যোগ দিব।
উল্লেখ্য যে, থালাপথী বিজয়ৰ পূৰ্বেও বহু নেতাই ৱাকফ সংশোধনী আইনৰ বিৰুদ্ধে আদালতৰ কাষ চাপিছে। ইয়াত তেওঁৰ সৈতে আছে এআইএমআইএমৰ সাংসদ আছাদুদ্দিন ওৱেইছি, কংগ্ৰেছৰ সাংসদ মহম্মদ জাভেদ আৰু ইমৰাণ প্ৰতাপগড়ী, আপৰ বিধায়ক অমনাতুল্লাহ খান আৰু আজাদ সমাজ পাৰ্টিৰ মুৰব্বী চন্দ্ৰশেখৰ আজাদ আৰু সমাজবাদী পাৰ্টিৰ সাংসদ জিয়া উৰ ৰেহমান বৰ্ক।
