ন্যায়াধীশ যশৱন্ত বাৰ্মাৰ ঘৰত টকাৰ বাণ্ডিল উদ্ধাৰ হোৱা ঘটনাক লৈ দেশজুৰি আৰম্ভ হোৱা প্ৰতিক্ৰিয়াৰ পিছতে দেশৰ সৰ্বোচ্চ ন্যায়ালয়ে গ্ৰহণ কৰিছে এটা ঐতিহাসিক সিদ্ধান্ত। এতিয়াৰে পৰা সৰ্বোচ্চ ন্যায়ালয়ৰ ন্যায়াধীশসকলে নিজৰ সম্পত্তিৰ হিচাপ ৰাজহুৱা কৰিব।
দেশৰ মুখ্য ন্যায়াধীশৰ ওচৰত প্ৰতিগৰাকী ন্যায়াধীশে সহমত প্ৰকাশ কৰাৰ পিছতে এই সিদ্ধান্ত গ্ৰহণ কৰা হয়। ন্যায়াধীশসকলৰ সম্পত্তিৰ তালিকা উচ্চতম ন্যায়ালয়ৰ ৱেবছাইটত উপলব্ধ হ’ব।
কিন্তু ইয়াক ৰাজহুৱা কৰাৰ পদ্ধতি কি হ’ব আৰু কেনেকৈ এই সিদ্ধান্ত লোৱা হৈছে সেয়া এই পৰ্যন্ত জানিব পৰা হোৱা নাই। উচ্চতম ন্যায়ালয়ৰ সূত্ৰ অনুসৰি ১ এপ্ৰিলত অনুষ্ঠিত হোৱা ফুল ক’ৰ্ট বৈঠকত এই সিদ্ধান্ত লোৱা হৈছে।
মুখ্য ন্যায়াধীশ সঞ্জীৱ খান্নাৰ সন্মুখত সকলো ন্যায়াধীশে সিদ্ধান্ত লয় যে সম্পত্তিৰ সবিশেষ অফিচিয়েল ৱেবছাইটত আপলোড কৰা হ’ব।
উচ্চতম ন্যায়ালয়ৰ ৱেবছাইটত প্ৰকাশ পোৱা তথ্য অনুসৰি মুখ্য ন্যায়াধীশকে ধৰি উচ্চতম ন্যায়ালয়ৰ ৩০জন ন্যায়াধীশে নিজৰ সবিশেষ দাখিল কৰিছে। এতিয়া ইয়াক আপলোড কৰাৰ পদ্ধতিৰ কথা বিবেচনা কৰি থকা হৈছে।
উল্লেখ্য যে এনেধৰণৰ সিদ্ধান্ত প্ৰথমবাৰৰ বাবে উচ্চতম ন্যায়ালয়ৰ পূৰ্ণাংগ আদালতে ২০০৯ চনৰ আগষ্ট মাহত গ্ৰহণ কৰিছিল। সেই সময়ত মুখ্য ন্যায়াধীশ জি বালকৃষ্ণন আৰু অন্যান্য ন্যায়াধীশসকলে এই সিদ্ধান্ত লৈছিল। তেতিয়া সিদ্ধান্ত লোৱা হৈছিল যে সকলো ন্যায়াধীশে নিজৰ লগতে তেওঁলোকৰ পত্নী আৰু আত্মীয়ৰ স্থাৱৰ আৰু স্থাৱৰ সম্পত্তি প্ৰকাশ কৰিব।
