আন্তঃৰাষ্ট্ৰীয় নাৰী দিৱস উপলক্ষে মহিলা সমৃদ্ধি যোজনাৰ সন্দৰ্ভত এই সভাত এটা ডাঙৰ ঘোষণা কৰা হৈছে। যাৰ বাবে শীঘ্ৰে মুকলি কৰা হ’ব এক পৰ্টেল।
আন্তঃৰাষ্ট্ৰীয় নাৰী দিৱস উপলক্ষে মুখ্যমন্ত্ৰী ৰেখা গুপ্তাৰ চৰকাৰে দিল্লীৰ মহিলাসকলক এক বৃহৎ উপহাৰ দিছে। শনিবাৰে দিল্লী কেবিনেটে মহিলা সমৃদ্ধি যোজনাত অনুমোদন জনাইছে। বিজেপিৰ ৰাষ্ট্ৰীয় সভাপতি জে পি নড্ডাই মহিলা সন্মান আঁচনি ৰূপায়ণৰ কথা ঘোষণা কৰে, যাৰ অধীনত মহিলাসকলে এতিয়া প্ৰতিমাহে ২৫০০ টকাৰ সন্মানীয় সন্মান লাভ কৰিব।
এইবাৰৰ বাবে ৫১০০ কোটি টকা আবণ্টন দিয়া হৈছে। ভাৰতীয় জনতা পাৰ্টিৰ ইস্তাহাৰত দিল্লীত মহিলা সমৃদ্ধি যোজনাৰ অধীনত প্ৰতিমাহে ২৫০০ টকাকৈ মহিলাক দিয়াৰ প্ৰতিশ্ৰুতি দিছিল। এনে পৰিস্থিতিত আজি দিল্লী কেবিনেটৰ অনুমোদন লাভ কৰিছে।
মন্ত্ৰীসকলৰ সৈতে কেবিনেট বৈঠকৰ অন্তত এই আঁচনিখনত অনুমোদন জনায় মুখ্যমন্ত্ৰী ৰেখা গুপ্তাই। প্ৰথম অৱস্থাত মহিলা সমৃধি যোজনাৰ সুবিধা কেৱল বিপিএল কাৰ্ডধাৰী মহিলাৰ বাবেহে উপলব্ধ হ’ব।
ইয়াৰ অধীনত নিৰ্বাচিত মহিলাসকলক আৰ্থিক সাহায্য প্ৰদান কৰা হ’ব, যাতে তেওঁলোকে নিজৰ পৰিয়ালৰ কল্যাণৰ বাবে আৰ্থিকভাৱে সবল হ’ব পাৰে। দিল্লীৰ জৱাহৰলাল নেহৰু ষ্টেডিয়ামত আয়োজিত কাৰ্যসূচীত মুখ্যমন্ত্ৰী ৰেখা গুপ্তাই কয় যে প্ৰধানমন্ত্ৰী মোদীয়ে যি কয় তাকেই কৰে।
এই আঁচনিখনৰ এটা গুৰুত্বপূৰ্ণ চৰ্ত হ’ল- এই আঁচনিৰ সুবিধা লাভ কৰিবলগীয়া বিপিএল কাৰ্ডধাৰী মহিলাসকলে আন কোনো চৰকাৰী আঁচনিৰ সুবিধা লোৱা উচিত নহয়। যিসকল মহিলা চৰকাৰী কৰ্মচাৰী নহয় বা অন্য চৰকাৰী আঁচনিৰ পৰা আৰ্থিক সাহায্য লাভ নকৰে, তেওঁলোকৰ ক্ষেত্ৰত এই আঁচনি প্ৰযোজ্য হ’ব। বৰ্তমান দিল্লী চৰকাৰে এটা অনলাইন পৰ্টেল প্ৰস্তুত কৰিছে, যাৰ জৰিয়তে এই আঁচনিৰ বাবে পঞ্জীয়ন কৰা হ’ব।
মুখ্যমন্ত্ৰী ৰেখা গুপ্তাই কয় যে, কেবিনেট বৈঠকৰ অন্তত দিল্লী চৰকাৰে মহিলা সন্মান সমৃদ্ধি যোজনাত অনুমোদন জনাইছে।আজিৰ এই দিনটোত তেওঁ আৱেগিক হৈ পৰিছে। এই উপহাৰ নাৰী দিৱসৰ আটাইতকৈ ডাঙৰ উপহাৰ। পূৰ্বৰ চৰকাৰসমূহে মহিলাৰ বাবে একোৱেই কৰা নাছিল যদিও বৰ্তমানৰ চৰকাৰে এই আশা পূৰ্ণ কৰিব।
মুখ্যমন্ত্ৰী ৰেখা গুপ্তাই লগতে কয় যে, ১৯৯৩ চনত যেতিয়া তেওঁ বিদ্যাৰ্থী পৰিষদত যোগদান কৰিছিল, তেতিয়া তেওঁৰ পৰিয়ালে এটা সংগঠনৰ অংশ হোৱাৰ অৰ্থ কি সেই বিষয়েও চিন্তা কৰা নাছিল। কিন্তু পিতৃয়ে শেষত মূলসুঁতিৰ ৰাজনীতিত সমাজৰ বাবে কাম কৰিবলৈ অনুপ্ৰাণিত কৰে।
