প্ৰাণৰ শিল্পী জুবিন গাৰ্গৰ ৰহস্যজনক মৃত্যুৰ আজি ২১ দিন উকলিল। কিন্তু বৰ্তমানেও গা নলৰিল ৭ ছিংগাপুৰীয়া অসমীয়াৰ। ৰূপকমল আহিল কিন্তু জুবিন গাৰ্গৰ মৃত্যুৰ তদন্ত চলাই থকা SITৰ সন্মুখত আজি পৰ্যন্ত হাজিৰ নহ’ল ছিংগাপুৰৰ আন ৭ প্ৰবাসী অসমীয়া।
অসমত জন্ম হৈ অসমতেই পঢ়ি-শুনি ডাঙৰ হৈ এতিয়া বিদেশত বৰ মানুহ হৈছে এইকেইজন অসমীয়া। গণৰোষৰ সন্মুখীন হোৱাৰ ভয়তেই হওঁক বা আন কোনো কাৰণতেই হওঁক জুবিন গাৰ্গৰ কেনেদৰে মৃত্যু হৈছিল, সেই কথা SITৰ সন্মুখত ক’বলৈ সাহস কৰা নাই ছিংগাপুৰৰ এই প্ৰবাসী অসমীয়াই। CID য়ে বান্ধি দিয়া সময় ওকলাৰ পিছতো SITৰ সন্মুখত হাজিৰ নহ’ল এইকেইজন ছিংগাপুৰীয়া অসমীয়া।
ইতিমধ্যে জুবিন গাৰ্গৰ মৃত্যুৰ গোচৰত ৫জনক গ্ৰেপ্তাৰ কৰি অসম আৰক্ষীৰ CIDৰ বিশেষ তদন্তকাৰী দলৰ তদন্ত অব্যাহত আছে ৷ আৰক্ষীৰ তথ্য মতে, সেইদিনা সমুদ্ৰত য়ট যাত্ৰা আয়োজন কৰিছিল এই লোক কেইগৰাকীয়ে । গতিকে জুবিনৰ মৃত্যুৰ অসম আৰক্ষীৰ তদন্তৰ আওতালৈ এওঁলোক অতি প্ৰয়োজনীয় বুলি বিবেচিত হৈছে। যাৰ বাবে জুবিন গাৰ্গৰ ছিংগাপুৰৰ সমুদ্ৰত ৰহস্যজনক মৃত্যুৰ সন্দৰ্ভত এছআইটিৰ সন্মুখত এওঁলোকক হাজিৰ হ’বলৈ জাননী জাৰি কৰিছিল এছআইটিয়ে ৷ সেই অনুসৰি ৬ অক্টোবৰ সোমবাৰৰ ভিতৰত তেওঁলোক অসমলৈ আহি গুৱাহাটীত এছ আই টিত হাজিৰ হ’ব লাগিছিল। কিন্তু কেবল এজনৰ বাদে বাকী ৭ জন আজিলৈ উপস্থিত নহল। অসমী আইৰ প্ৰতি ইমানখিনিও মৰম নাই নে এওঁলোকৰ, যে অসমী আইৰ অতি মৰমৰ সন্তানটিৰ মৃত্যুৰ তদন্তত সহায় কৰিব নোৱাৰে এইকেইজন তথাকথিত অসমীয়াই।
উল্লেখ্য যে, অসম আৰক্ষীৰ চি আই ডিৰ সন্মুখত হাজিৰ হ’বলগীয়া জুবিন মৃত্যুৰ সময়ত লেজাৰাছ আইলেণ্ডৰ সমুদ্ৰবক্ষত য়টখনত থকা ছিংগাপুৰ নিৱাসী প্ৰৱাসী আঠগৰাকী হ’ল-
- তন্ময় ফুকন, য়ট পাৰ্টীৰ আয়োজক
- অভিমন্যু তালুকদাৰ, সভাপতি,আছাম এছ’চিয়েচন,ছিংগাপুৰ
- দেৱজিত হাজৰিকা, সম্পাদক, আছাম এছ’চিয়েচন,ছিংগাপুৰ
- ৰূপকমল কলিতা, ছিংগাপুৰস্থিত প্রবাসী অসমীয়া
- সিদ্ধার্থ বৰা, ছিংগাপুৰস্থিত প্ৰবাসী অসমীয়া
- পৰীক্ষিত শৰ্মা, ছিংগাপুৰস্থিত প্রবাসী অসমীয়া
- ৱাজিদ আহমেদ, ছিংগাপুৰস্থিত প্রবাসী অসমীয়া
- ভাস্কৰ দত্ত, ছিংগাপুৰস্থিত প্রবাসী অসমীয়া
