আজিৰে পৰা আৰম্ভ বিশ্ব ক্ৰিকেটৰ আন এক ২২ গজৰ মহাৰণ আইচিচি চেম্পিয়নছ ট্ৰফীৰ ৯ম ছিজন। পাকিস্তানত আৰম্ভ হব চেম্পিয়নছ ট্ৰফীৰ প্ৰথমখন মেচ। কৰাচীৰ নেশ্যনেল বেংক ষ্টেডিয়ামত ডিফেণ্ডিং চেম্পিয়ন পাকিস্তান আৰু নিউজিলেণ্ডৰ মাজত অনুষ্ঠিত হ’ব প্ৰতিযোগিতাখনৰ প্ৰথমখন খেল।
প্ৰায় ৮ বছৰৰ পাছত এইবাৰ পাকিস্তানৰ আতিথ্যত অনুষ্ঠিত হ’ব চেম্পিয়নছ ট্ৰফী। পিছে এই প্ৰতিযোগিতাখন হাইব্ৰিড মডেলত অনুষ্ঠিত হ’ব। আচলতে প্ৰতিযোগিতাৰ বাবে বিচিচিআইয়ে পাকিস্তানলৈ পঠোৱা নাই টীম ইণ্ডিয়াক। এনে পৰিস্থিতিত টীম ইণ্ডিয়াই নিজৰ সকলো মেচ ডুবাইত খেলিব। ইয়াৰ বাহিৰে আন দলৰ মেচ কেৱল পাকিস্তানতেই অনুষ্ঠিত হ’ব।
বিয়লি ২:৩০বজাৰ পৰা অনুষ্ঠিত হ’ব এই খেল।এই খেলৰ পূৰ্বে টীম ইণ্ডিয়াৰ প্ৰাক্তন প্ৰবীণ স্পিনাৰ ৰবিচন্দ্ৰন অশ্বিনে প্ৰতিযোগিতাখনক লৈ নিজৰ অনুভৱ প্ৰকাশ কৰিছে।
কেৱল এয়াই নহয়, চেম্পিয়নছ ট্ৰফী ২০২৫ৰ ছেমি ফাইনেলত প্ৰৱেশ কৰিব পৰা ৪টা দলৰ নাম তেওঁ ভৱিষ্যদ্বাণী কৰিছে।
এই সন্মানীয় প্ৰতিযোগিতাখনৰ বাবে আটাইকেইটা দলকে দুটা গ্ৰুপত স্থান দিয়া হৈছে। টীম ইণ্ডিয়াৰ বাহিৰেও প্ৰথম গ্ৰুপত নিউজিলেণ্ড, পাকিস্তান, বাংলাদেশ অন্তৰ্ভুক্ত। আনহাতে দ্বিতীয় গ্ৰুপত অষ্ট্ৰেলিয়া, ইংলেণ্ড, আফগানিস্তান আৰু দক্ষিণ আফ্ৰিকাৰ দলক স্থান দিয়া হৈছে। ভাৰতীয় কিংবদন্তিগৰাকীয়ে ছেমি ফাইনেলৰ বাবে প্ৰথম গ্ৰুপৰ পৰা ভাৰত আৰু নিউজিলেণ্ডক নিৰ্বাচিত কৰাৰ বিপৰীতে দ্বিতীয় গ্ৰুপৰ পৰা অষ্ট্ৰেলিয়া আৰু ইংলেণ্ডক নিৰ্বাচিত কৰিছে।
ৰবিচন্দ্ৰন অশ্বিনেও বৰ্তমানৰ শক্তি আৰু ভাৰসাম্যৰ ওপৰত ভিত্তি কৰি সকলো দলকে নম্বৰ দিছে। য’ত ভাৰত আৰু নিউজিলেণ্ডৰ দলে ১০০ৰ ভিতৰত সৰ্বাধিক ৮৫-৮৫ পইণ্ট লাভ কৰে। ইংলেণ্ডক ৮১ পইণ্ট আৰু অষ্ট্ৰেলিয়াক ৭৮ পইণ্ট দিছে।
আমোদজনক কথাটো হ’ল ভাৰতীয় কিংবদন্তিগৰাকীয়ে আফগানিস্তানৰ দলটোক ৭০ পইণ্টেৰে পঞ্চম স্থানত স্থান দিছে৷ দক্ষিণ আফ্ৰিকা, পাকিস্তান আৰু বাংলাদেশ দলে ক্ৰমে ৬৮, ৫৫ আৰু ৪০ পইণ্টেৰে ষষ্ঠ, সপ্তম আৰু অষ্টম স্থানত আছে।
কথা-বতৰাৰ সময়ত অশ্বিনে কয় যে, যদিহে যশপ্ৰীত বুমৰাহে এই প্ৰতিযোগিতাখনত অংশগ্ৰহণ কৰিলেহেতেন, তেতিয়া হয়তো টীম ইণ্ডিয়াক তেওঁ ১০০ৰ ভিতৰত ৯০ পইন্ট দিলেহেঁতেন।
চেম্পিয়নছ ট্ৰফী ২০২৫ৰ সমপূৰ্ণ সময়সূচীখন হ’ল –
১৯ ফেব্ৰুৱাৰী- পাকিস্তান বনাম নিউজিলেণ্ড
২০ ফেব্ৰুৱাৰী- বাংলাদেশ বনাম ভাৰত
২১ ফেব্ৰুৱাৰী- আফগানিস্তান বনাম দক্ষিণ আফ্ৰিকা
২২ ফেব্ৰুৱাৰী- অষ্ট্ৰেলিয়া বনাম ইংলেণ্ড
২৩ ফেব্ৰুৱাৰী- পাকিস্তান বনাম ভাৰত
২৪ ফেব্ৰুৱাৰী- বাংলাদেশ বনাম নিউজিলেণ্ড
২৫ ফেব্ৰুৱাৰী- অষ্ট্ৰেলিয়া বনাম দক্ষিণ আফ্ৰিকা
২৬ ফেব্ৰুৱাৰী- আফগানিস্তান বনাম ইংলেণ্ড
২৭ ফেব্ৰুৱাৰী- পাকিস্তান বনাম বাংলাদেশ
২৮ ফেব্ৰুৱাৰী- আফগানিস্তান বনাম অষ্ট্ৰেলিয়া
১ মাৰ্চ- দক্ষিণ আফ্ৰিকা বনাম ইংলেণ্ড
২ মাৰ্চ- নিউজিলেণ্ড বনাম ভাৰত
SF1- ৪ মাৰ্চ, ছেমিফাইনেল ১
SF2- ৫ মাৰ্চ, ছেমিফাইনেল ২
ফাইনেল – ৯ মাৰ্চ
