ৰাজস্থানৰ বিকানেৰৰ পৰা আহিছে এটা হৃদয় বিদাৰক খবৰ। ভাৰোত্তোলনৰ সময়ত মহিলা ভাৰোত্তোলক য়াস্তিকা আচাৰ্যই কৰুণ মৃত্যুক সাৱটি লয়। কিছু দিন পূৰ্বে গোৱাত অনুষ্ঠিত হোৱা ৩৩ সংখ্যক নেচনেল বেঞ্চ প্ৰেছ চেম্পিয়নছিপৰ ইকুইপড কেটেগৰীত য়াস্তিকাই স্বৰ্ণ আৰু ক্লাছিক কেটেগৰীত ৰূপৰ পদক জয়ী হৈছিল।
নেচনেল চেম্পিয়নৰ খিতাপ অৰ্জন কৰা য়াস্তিকাই ষ্টেট টুৰ্ণামেণ্টৰ বাবে প্ৰস্তুতি চলাই আছিল। য়াস্তিকাৰ পিতৃ ঐশ্বৰ্য আচাৰ্য পেচাত এজন ঠিকাদাৰ।
মঙলবাৰে সন্ধিয়া প্ৰায় ৭ বজাত বিকানেৰৰ আচাৰ্য চ’কৰ বাসিন্দা য়াস্তিকাই নিয়মীয়া অনুশীলনত ব্যস্ত আছিল। অনুশীলনৰ সময়ত তেওঁৰ প্ৰশিক্ষকো তেওঁৰ লগত আছিল। অনুশীলন কৰি থকা সময়তে হঠাৎ য়াস্তিকাৰ ডিঙিত পৰে ২৭০ কিলোগ্ৰাম ওজনযুক্ত ডাম্বেল। লগে লগে তেওঁৰ আশে পাশে অনুশীলনত ব্যস্ত থকা আন খেলুৱৈসকলে তেওঁৰ শৰীৰৰ পৰা ওজনসমূহ আঁতৰাই দিয়ে।
১৭ বছৰীয়া য়াষ্টিকা আচাৰ্যক প্ৰথমে চিপিআৰ আৰু জিমতে প্ৰাথমিক চিকিৎসা প্ৰদান কৰা হৈছিল। কিন্তু সংজ্ঞা ঘূৰাই নোপোৱাত লগে লগে তেওঁক চিকিৎসালয়লৈ লৈ যোৱা হয় আৰু চিকিৎসালয়ত ভৰ্তি কৰোৱাৰ পিছতে চিকিৎসকে তেওঁক মৃত ঘোষণা কৰে।
