সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
মুখ্যমন্ত্ৰী হোৱাৰ স্বপ্নভংগ হ’ল গৌৰৱ গগৈৰ। বিজেপিৰ ঢৌত উটি গ’ল কংগ্ৰেছৰ চৰকাৰ গঠনৰ সপোন। মুখ্যমন্ত্ৰীয়ে কোৱাৰ দৰে ১০২ খন আসনত জয়ী হয় বিজেপি মিত্ৰজোঁটে। আনহাতে ২১ খন আসনতে থমকি ৰয় কংগ্ৰেছ।
২০২৬ৰ নিৰ্বাচনত কেবল মুছলমানেহে বচালে কংগ্ৰেছ দলৰ সন্মান। ১৯ গৰাকী কংগ্ৰেছী বিধায়কৰ ১৮ জনেই মুছলমান। অসমৰ হিন্দু সমাজে প্ৰত্যাখ্যান কৰিছে কংগ্ৰেছক। মুখ্যমন্ত্ৰীয়ে কোৱাৰ দৰে সংখ্যালঘু এলেকাতহে নিজৰ অস্তিত্ব ৰক্ষা কৰিবলৈ সক্ষম হয় কংগ্ৰেছে।আনহাতে বিৰোধী মিত্ৰজোঁটৰ জয়ী প্ৰাৰ্থীৰ ভিতৰত কেৱল ২গৰাকীহে হিন্দু।
এইবাৰ পশ্চিম বংগৰ ৰাজনীতিত এক বৃহৎ টাৰ্নিং পইণ্ট দেখা যায়। বিজেপিয়ে ঐতিহাসিক জয় লাভ কৰি ২০০ আসনৰ সীমাত উপনীত হয়। এই বিজয়ে কেৱল ক্ষমতাৰ পৰিৱৰ্তনেই নহয়, দীৰ্ঘদিনীয়া ৰাজনৈতিক ধাৰাত নিৰ্ণায়ক পৰিৱৰ্তনকো সূচাইছে। বিজেপিয়ে টিএমচিৰ ১৫ বছৰীয়া শাসনৰ বিৰুদ্ধে অসন্তুষ্টি জগাই তুলি দুৰ্নীতি, নিবনুৱা সমস্যা, শাসন ব্যৱস্থা আদি বিষয়ত গুৰুত্ব দি পশ্চিমবংগৰ নিৰ্বাচনী আখ্যান সলনি কৰি তুলিছিল। মহিলা, যুৱক-যুৱতী, কৃষক, মধ্যবিত্ত শ্ৰেণীৰ প্ৰতি দিয়া প্ৰতিশ্ৰুতিয়ে ব্যাপক সমৰ্থন লাভ কৰিছিল।
তামিলনাডুৰ ৰাজনীতিতো এক ঐতিহাসিক পৰিৱৰ্তন দেখা যায়। ৰাজনীতিত ভৰি থৈয়েই তামিলনাডুত বিজয়ধ্বজ্জা উৰুৱাবলৈ সক্ষম হয় ছুপাৰষ্টাৰ বিজয় থালাপতিয়ে।অভিনেতাৰ পৰা মুখ্যমন্ত্ৰী হোৱাৰ দিশে দক্ষিণৰ ছুপাৰষ্টাৰ বিজয়। ৬০ বছৰ ধৰি তামিলনাডুত চলি থকা DMK আৰু AIDMK ক উৎখাত কৰে বিজয় থালাপতিয়ে।
যুদ্ধৰ অন্ত পেলোৱাৰ ক্ষেত্ৰত ৱাশ্বিংটন আৰু তেহৰানে কোনো চুক্তিত উপনীত হোৱাত ব্যৰ্থ হোৱাৰ পিছত পুনৰ উত্তেজনা বৃদ্ধি পাইছে। ইৰানে যুদ্ধবিৰতি উলংঘা কৰি সোমবাৰে সংযুক্ত আৰব আমিৰশ্বাহী (ইউ এ ই)ত ড্ৰোন আৰু মিছাইল আক্ৰমণ চলায়। ৮ এপ্ৰিলত যুদ্ধবিৰতি ঘোষণা কৰাৰ পিছত ইৰাণৰ এইটোৱেই প্ৰথম বৃহৎ সামৰিক পদক্ষেপ বুলি অনুমান কৰা হৈছে। ইউ এ ইৰ বিষয়াসকলে এই ভাবুকি নিশ্চিত কৰি কয় যে বৈদেশিক আৰু প্ৰতিৰক্ষা মন্ত্ৰালয়ে জৰুৰীকালীন সতৰ্কবাণী জাৰি কৰিছে, আৰু বিমান প্ৰতিৰক্ষা ব্যৱস্থা সক্ৰিয় কৰা হৈছে।
