২১ ফেব্ৰুৱাৰীৰ পৰা ২৫ ফেব্ৰুৱাৰীলৈ ৰাষ্ট্ৰীয় স্বয়ংসেৱক সংঘৰ পৰম পূজনীয় সৰসংঘচালক ডা°মোহন ভাগৱত অসমত উপস্হিত হৈ কেবাটাও কাৰ্যক্ৰমত অংশগ্ৰহণ কৰিছে। ইয়াৰ অংশ হিচাপে আজি পুৱা গুৱাহাটীৰ বৰ্ষাপাৰাৰ ছাউথ পইন্ট স্কুলত গুৱাহাটী মহানগৰৰ শাখা টোলী আৰু ইয়াৰ ওপৰৰ কাৰ্যকৰ্তাৰ এক বৌদ্ধিক কাৰ্যক্ৰম অনুষ্ঠিত হয়।
অনুষ্ঠানত মহানগৰৰ সহস্ৰাধিক স্বয়ংসেৱকৰ উপস্থিতিত ৰাষ্ট্ৰীয় স্বয়ংসেৱক সংঘৰ সৰসংঘচালক মোহন ভাগৱতে বৌদ্ধিক প্ৰদান কৰে। মূলতঃ ভাগৱতে ৰাষ্ট্ৰীয় স্বয়ংসেৱক সংঘৰ শতবৰ্ষত সংগঠনটোৰ কাৰ্য বিস্তাৰ, কাৰ্য দৃঢ়িকৰণ, শাখাৰ দ্বাৰা সমাজ পৰিৱৰ্তন আদি বিষয় সমূহ কিদৰে সমাজৰ মাজলৈ নিব পাৰি এই সন্দৰ্ভত স্বয়ংসেৱক সকলৰ লগত মত -বিনিময় কৰে।
আনহাতে, ৰাষ্ট্ৰীয় স্বয়ংসেৱক সংঘই সমাজ পৰিৱৰ্তনৰ দিশত কৰি অহা পঞ্চ পৰিৱৰ্তনৰ বিষয় সমূহ যেনে – সামাজিক সমৰসতা, নাগৰিক কৰ্তব্য, পৰ্যাৱৰণ, স্বদেশী সামগ্ৰী ব্যৱহাৰ, কুটুম্ব প্ৰবোধন আদি বিষয় সমূহ স্বয়ংসেৱক সকলৰ জড়িয়তে সৰ্বস্তৰৰ ৰাইজৰ মাজলৈ কেনেদৰে লৈ যাব পাৰে তাৰ ওপৰতো ভাগৱতে বক্তব্য প্ৰদান কৰে।
আবেলি মহানগৰৰ এটা বিদ্যাৰ্থী শাখাত উপস্থিত হৈ শাখা টোলীৰ বৈঠকত অংশগ্ৰহণ কৰে।
উল্লেখ্য, ২৬ ফেব্ৰুৱাৰীৰ পুৱা ৰাষ্ট্ৰীয় স্বয়ংসেৱক সংঘৰ সৰসংঘচালক ডা: মোহন ভাগৱতে অৰুণাচললৈ বুলি ৰাওনা হ’ব বুলি প্ৰান্ত প্ৰচাৰ প্ৰমুখ কিশোৰ শিৱমে একেটা বিজ্ঞপ্তিযোগে জানিবলৈ দিছে ৷
