২৫ ফেব্ৰুৱাৰীত ছিৰিয়াৰ ৰাজধানী ডামাস্কাছ আৰু দক্ষিণ প্ৰদেশ দাৰাত বিমান আক্ৰমণ চলায় ইজৰাইলৰ যুদ্ধ বিমানে। নিৰাপত্তা সূত্ৰ আৰু ছিৰিয়াৰ সংবাদ মাধ্যমৰ তথ্য অনুসৰি, এই আক্ৰমণত সামৰিক স্থানক লক্ষ্য কৰি লোৱা হৈছিল।
ডামাস্কাছৰ বাসিন্দাসকলে নিশা কেইবাটাও বিস্ফোৰণ আৰু যুদ্ধ বিমানৰ শব্দ শুনিবলৈ পায়। ইজৰাইলৰ প্ৰতিৰক্ষা মন্ত্ৰী ইজৰাইল কাটজে এই বিমান আক্ৰমণ নিশ্চিত কৰিছে।
ইজৰাইলৰ প্ৰতিৰক্ষা মন্ত্ৰী কাটজে কয় যে, ইজৰাইল প্ৰতিৰক্ষা বাহিনীৰ বাফাৰ জ’ন ছিৰিয়া বাহিনী বা সন্ত্ৰাসবাদী সংগঠনে উলংঘা কৰাত বাধা দিবলৈ এই আক্ৰমণ সংঘটিত কৰা হৈছে। কাটজে লগতে কয় যে, তেওঁলোকে দক্ষিণ ছিৰিয়াক দক্ষিণ লেবানন হ’বলৈ নিদিয়ে।
ছিৰিয়াৰ নিৰাপত্তা সূত্ৰ অনুসৰি, ইজৰাইলৰ বিমানে ডামাস্কাছৰ পৰা প্ৰায় ২০ কিলোমিটাৰ দূৰত্বত অৱস্থিত কিছৱা চহৰৰ এটা সামৰিক স্থানক লক্ষ্য কৰি লৈছিল। খবৰ অনুসৰি, এই আক্ৰমণত ২জন লোকৰ প্ৰাণহানি হোৱাৰ লগতে আহত হয় কেইবাজনো লোক।
আৰবী কাকত আল-হাদাথে কয় যে, এই বিমান আক্ৰমণত ডামাস্কাছৰ বাহিৰৰ অঞ্চলত সামৰিক বাহনৰ এটা দলক লক্ষ্য কৰি লোৱা হৈছে।
ইফালে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে শেহতীয়াকৈ কয় যে, ইজৰাইলে দক্ষিণ ছিৰিয়াত হায়াত-তাহৰিৰ আল-শ্বাম (এইচটিএছ) বা আন কোনো বিদ্ৰোহী শক্তিৰ উপস্থিতি সহ্য নকৰে।
