৩ মাৰ্চত আমেৰিকাৰ ৰাষ্ট্ৰপতি ড’নাল্ড ট্ৰাম্পে ইউক্ৰেইনলৈ দিয়া সকলো সামৰিক সাহায্য বন্ধ কৰাৰ নিৰ্দেশ দিয়ে। ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিৰ সৈতে অ’ভেল অফিচত হোৱা সংঘৰ্ষৰ মাত্ৰ কেইদিনমানৰ পিছতে এই নিৰ্দেশ দিয়া হৈছে।
ব্লুমবাৰ্গে প্ৰতিৰক্ষা বিভাগৰ এজন জ্যেষ্ঠ বিষয়াৰ উদ্ধৃতি দি কয় যে, ট্ৰাম্পে জেলেনস্কিয়ে শান্তিৰ প্ৰতি সদ্ভাৱৰ প্ৰতিশ্ৰুতি দিছে নে নাই সেইটো নিৰ্ণয় নকৰালৈকে আমেৰিকাই ইউক্ৰেইনলৈ বৰ্তমানৰ সকলো সামৰিক সাহায্য বন্ধ কৰি ৰাখিছে।
অ’ভেল অফিচত অনুষ্ঠিত এখন বৈঠকত জেলেনস্কিয়ে ৰাছিয়াৰ সৈতে যিকোনো শান্তি চুক্তি নিশ্চিত কৰিবলৈ নিৰাপত্তাৰ নিশ্চয়তা প্ৰদানৰ দাবী জনায়। এই উত্তেজনাপূৰ্ণ বৈঠকৰ পিছত ইউৰোপীয় মিত্ৰ দেশসমূহে ক্ষন্তেকতে ইউক্ৰেইনক অস্ত্ৰ প্ৰদান আৰু শান্তিৰক্ষী বাহিনী প্ৰেৰণৰ পৰিকল্পনা কৰিবলৈ আৰম্ভ কৰে।
ৰাছিয়া আৰু ইউক্ৰেইনৰ মাজত ৩ বছৰীয়া যুদ্ধৰ অন্ত পেলাবলৈ শান্তি চুক্তিৰ বাবে জোৰ দিছে ড’নাল্ড ট্ৰাম্পে। অৱশ্যে জেলেনস্কিৰ নিৰাপত্তাৰ দাবীয়ে চুক্তিখন অধিক জটিল কৰি তুলিছে। ইতিমধ্যে ট্ৰাম্পে ঘোষণা কৰে যে, শান্তি চুক্তিৰ প্ৰক্ৰিয়া আগবাঢ়ি যোৱালৈকে আমেৰিকাৰ পৰা কোনো সাহায্য প্ৰদান কৰা নহ’ব।
ট্ৰাম্পৰ এই নিৰ্দেশৰ ফলত সামৰিক সাহায্য কিমান প্ৰভাৱিত হ’ব সেয়া এতিয়াও স্পষ্ট হোৱা নাই। পূৰ্বৰ প্ৰশাসনৰ পৰা বাকী থকা ৩.৮৫ বিলিয়ন ডলাৰৰ ধন ইউক্ৰেইনৰ বাবে ব্যৱহাৰ কৰা হ’ব নে নহয় সেই সম্পৰ্কে অনিশ্চিত হৈ পৰিছে ট্ৰাম্প প্ৰশাসন। এই অৱৰোধৰ ফলত পূৰ্বতে নিৰ্ধাৰিত চুক্তি আৰু অস্ত্ৰ ডেলিভাৰীও বিপন্ন হৈছে, য’ত আছে গুৰুত্বপূৰ্ণ যুদ্ধ সামগ্ৰী আৰু টেংক বিৰোধী অস্ত্ৰ।
ট্ৰাম্পৰ এই নিৰ্দেশৰ পিছতে ইউৰোপীয় মিত্ৰ দেশসমূহে ইউক্ৰেইনক সহায় কৰাৰ পৰিকল্পনা পুনৰ বিবেচনা কৰিবলৈ আৰম্ভ কৰিছে। যদিও ইউৰোপৰ হাতত আমেৰিকাৰ দৰে সামৰিক সম্পদ নাই, তথাপিও তেওঁলোকে যিমান পাৰি সোনকালে সাহায্য প্ৰদানৰ চেষ্টা চলাইছে। ইউৰোপীয় বিষয়াসকলৰ মতে, ইউক্ৰেইনলৈ অস্ত্ৰ-শস্ত্ৰৰ যোগান গ্ৰীষ্মকাললৈকেহে চলিব।
