পৃথক ৰাষ্ট্ৰৰ দাবী কৰি অহা বিদ্ৰোহী সংগঠন বেলুচ লিবাৰেশ্যন আৰ্মীয়ে মঙলবাৰে জাফৰ এক্সপ্ৰেছ নামৰ এখন যাত্ৰীবাহী ৰে’ল হাইজেক কৰা ঘটনাই তীব্ৰ চাঞ্চল্যৰ সৃষ্টি কৰিছে পাকিস্তানত।
পাকিস্তানৰ দক্ষিণ-পশ্চিম বেলুচিস্তান প্ৰদেশৰ কুৱেটাৰ পৰা খাইবাৰ পখতুনখোৱাৰ পেছাৱাৰলৈ গৈ থকা সময়তে জাফৰ এক্সপ্ৰেছখন হাইজেক কৰে বেলুচিস্তান আৰ্মীয়ে। ৯টা দবা সংযুক্ত এই ৰে’লখনত কমেও ৪০০ যাত্ৰী আছিল। ইয়াৰে প্ৰায় ১০০ গৰাকী যাত্ৰী পাকিস্তানী সেনা, আৰক্ষী আৰু আই এছ আইৰ কৰ্মী।
জানিব পৰা অনুসৰি, বিদ্ৰোহীয়ে ৰে’লখন হাইজেক কৰি এটা সুৰংগৰ ভিতৰলৈ লৈ গৈছিল। এই ঘটনাৰ পিছতে পাকিস্তানী সেনাৰ বৃহত দলে বিদ্ৰোহীৰ হাতৰ পৰা ৰে’লখন উদ্ধাৰৰ বাবে অভিযান আৰম্ভ কৰে।
শেহতীয়াকৈ লাভ কৰা খবৰ অনুসৰি, সেনা বাহিনীয়ে এই পৰ্যন্ত বিদ্ৰোহীৰ কৱলৰ পৰা ৮০ গৰাকী পণবন্দীক উদ্ধাৰ কৰিছে। এই অভিযানৰ সময়ত হোৱা সংঘৰ্ষত কমেও ১৬ গৰাকী বিদ্ৰোহীৰ মৃত্যু হোৱা বুলি দাবী কৰিছে পাক সেনাই। ১০০ৰো অধিক পণবন্দীক উদ্ধাৰৰ বাবে দুয়ো পক্ষৰ মাজত এতিয়াও সংঘৰ্ষ চলি আছে বুলি জানিব পৰা গৈছে।
এই অভিযান সন্দৰ্ভত বেলুচিস্তান চৰকাৰৰ মুখপাত্ৰ চাহিদ ৰিন্দই কয়, ‘নিৰাপত্তাৰক্ষীয়ে এটা দবাৰ পৰা ৮০ গৰাকী যাত্ৰীক উদ্ধাৰ কৰিছে। ইয়াৰ ভিতৰত আছে ৪৩ গৰাকী পুৰুষ, ২৬ গৰাকী মহিলা আৰু ১১ টি শিশু। অভিযানৰ সময়ত নিহত হৈছে ১৩গৰাকী সন্ত্ৰাসবাদী।’
চৰকাৰ-প্ৰশাসনৰ এই দাবীৰ বিপৰীতে ৰে’ল হাইজেক কৰা লিবাৰেশ্যন আৰ্মীয়ে ৩০ গৰাকী পাক সেনাক হত্যা কৰা বুলি দাবী কৰিছে।
ইফালে বেলুচিস্তান চৰকাৰৰ মুখপাত্ৰ চাহিদ ৰিন্দই জানিব দিয়া অনুসৰি, সুৰংগৰ ভিতৰত থকা ৰে’লখনত এতিয়াও ৪০০ গৰাকী যাত্ৰী আৱদ্ধ হৈ আছে। হাইজেক কৰা সন্ত্ৰাসবাদী নিৰাপত্তাৰক্ষীৰ মাজত চলি আছে সংঘৰ্ষ।
আনহাতে এগৰাকী শীৰ্ষ আৰক্ষী বিষয়াই জানিব দিয়া অনুসৰি, জৰুৰীকালীন অৱস্থা ঘোষণা কৰাৰ লগতে সেই স্থানতে অতিৰিক্ত নিৰাপত্তা বাহিনী মোতায়েন কৰা হৈছে।
মঙলবাৰে এই ৰে’লখন হাইজেক কৰি বেলুচিস্তান লিবাৰেশ্যন আৰ্মীয়ে পাক সেনাক ধমক প্ৰদান কৰিছিল যে যদিহে পাক সেনাই উদ্ধাৰ অভিযান চলাবলৈ আহে তেন্তে ৰে’লখনত থকা এজনো যাত্ৰী জীয়াই নাথাকিব।
উল্লেখ্য যে, পৃথক ৰাষ্ট্ৰৰ দাবীত ২০০০ চনত গঠন হৈছিল বেলুচিস্তান লিবাৰেশ্যন আৰ্মীৰ। সংগঠনটো আত্মপ্ৰকাশ হোৱাৰ পিছৰে পৰা চৰকাৰ আৰু সেনাৰ বিৰুদ্ধে একপ্ৰকাৰ যুদ্ধত লিপ্ত হৈ আছে।
