ক্ৰীড়া ক্ষেত্ৰৰ পৰা আহিছে এক হৃদয় বিদাৰক খবৰ। খেল চলি থকাৰ মাজতেই মৃত্যু ঘটিল বাংলাদেশৰ শীৰ্ষ দবা খেলুৱৈৰ। ৫ জুলাইত বাংলাদেশৰ জনপ্ৰিয় দবা খেলুৱৈ জিয়াউৰ ৰহমানে মৃত্যুক সাৱটি লয়।
জানিব পৰা অনুসৰি, নেচনেল চেম্পিয়নশ্বিপৰ মেচ চলি থকাৰ সময়ত হৃদৰোগত আক্ৰান্ত হৈছিল জিয়াউৰ। আৰু ইয়াৰ পিছতেই তেওঁৰ মৃত্যু হয়। মৃত্যুৰ সময়ত তেওঁৰ বয়স হৈছিল ৫০ বছৰ।
জিয়াউৰ ৰহমানে নিজৰ প্ৰতিদ্বন্দ্বি ইনামুল হুছেইনৰ বিৰুদ্ধে চেম্পিয়নশ্বিপৰ ১২ সংখ্যক ৰাউণ্ড খেলি থকা অৱস্থাত হঠাতে ব’ৰ্ডত ঢলি পৰে। লগে লগে তেওঁক ঢাকাৰ এখন হাস্পতাললৈ লৈ যোৱা হৈছিল। কিন্তু হাস্পতাল পোৱাৰ পূৰ্বেই তেওঁৰ মৃত্যু হোৱা বুলি চিকিৎসকে ঘোষণা কৰে।
উল্লেখ্য যে, জিয়াউৰ ৰহমানৰ পুত্ৰইও এই চেম্পিয়নশ্বিপখনত খেলি আছিল। পুত্ৰৰ সন্মুখতেই নিজৰ পিতৃয়ে মৃত্যুক সাৱটি লোৱাৰ এই খবৰে ক্ৰীড়া জগতত শোকৰ ছাঁ পেলাইছে।
দেশখনৰ শীৰ্ষ দবা খেলুৱৈৰ ভিতৰত এজন আছিল জিয়াউৰ । তেওঁ বহুবাৰ ৰাষ্ট্ৰীয় চেম্পিয়নশ্বিপ জয়ী হৈছে। শেহতীয়াকৈ ভাৰতত অনুষ্ঠিত হোৱা এখন সন্মানীয় প্ৰতিযোগিতাত তেওঁ নিজ দেশ বাংলাদেশক প্ৰতিনিধিত্ব কৰিছিল।
