আজি ডিব্ৰুগড়ত অনুষ্ঠিত হয় অসম চৰকাৰৰ কেবিনেট বৈঠক। ডিব্ৰুগড় সচিবালয়ত মুখ্যমন্ত্ৰী কাৰ্যালয়ত মুখ্যমন্ত্ৰী হিমন্ত বিশ্ব শৰ্মাৰ নেতৃত্বত অনুষ্ঠিত হয় এই গুৰুত্বপূৰ্ণ কেবিনেট বৈঠক। এই বৈঠকত লোৱা হয় কেইবাটাও গুৰুত্বপূৰ্ণ সিদ্ধান্ত।
বৈঠকৰ অন্তত সংবাদমেল সম্বোধন কৰি মুখ্যমন্ত্ৰী শৰ্মাই আজি কেবিনেট বৈঠকত লোৱা সিদ্ধান্ত সমূহ ৰাজহুৱা কৰে। প্ৰধানমন্ত্ৰী নৰেন্দ্ৰ মোদীক ধন্যবাদ জ্ঞাপন কৰি সংবাদমেল আৰম্ভ কৰা মুখ্যমন্ত্ৰীয়ে নামৰূপত ইউৰীয়া আৰু এমনীয়া প্লাণ্টৰ বাবে টকা অনুমোদন দিয়াৰ বাবে কৃতজ্ঞতা প্ৰকাশ কৰে।
কেবিনেটে মৰাণ জনগোষ্ঠীৰ বাবে গুৰুত্বপূৰ্ণ সিদ্ধান্ত গ্ৰহণ কৰে। অৰুণাচল প্ৰদেশত বসবাস কৰা জনগোষ্ঠীটোৰ লোকসকলক অসমৰ স্থায়ী বাসিন্দাৰ প্ৰমাণপত্ৰ প্ৰদান কৰিব। এই জনগোষ্ঠীটোৱে অসমত চাকৰি, সংৰক্ষণ, শিক্ষাৰ সকলো সুবিধা লাভ কৰিব।
ইফালে NHM ত কৰ্মৰত বিষয়া-কৰ্মচাৰীসকলৰ চৰকাৰী চাকৰিৰ ক্ষেত্ৰত বয়সৰ সীমাও প্ৰত্যাহৰৰ সিদ্ধান্ত গ্ৰহণ কৰে। আনহাতে গোৱালপাৰা চিভিল হস্পিটেলখন ‘নিধৰুৰাম ৰাজবংশী অসামৰিক চিকিৎসালয়’ হিচাপে পৰিচিত হ’ব।
আন আন সিদ্ধান্তসমূহ হ’ল-
গ্ৰামাঞ্চলৰ ৱেলনেচ চেণ্টাৰত বিনামূলীয়া চিকিৎসা শিৱিৰ হ’ব।
এমালগেচনৰ পাছত বন্ধ হোৱা বিদ্যালয় আয়ুক্তৰ অধীনত থাকিব। যিকোনো চৰকাৰী কামত ব্যৱহাৰ কৰিব পাৰিব।
জোনাই সমষ্টিত চিমেন চিচি টাঙনি নামেৰে নতুন ব্লক গঠন।
কমতাপুৰ, মৰাণ আৰু মটক স্বায়ত্ত শাসিত পৰিষদীয় এলেকাত ৫০ শতাংশতকৈ কম স্ব-জনগোষ্ঠীয় লোক থাকিলেও পৰিষদত অন্তৰ্ভুক্ত হ’ব।
গুৱাহাটী, ডিব্ৰুগড়, শিলচৰত ২৪ ঘন্টাই দোকান খোলা থাকিব। চহৰত ২ বজালৈ আৰু গ্ৰামাঞ্চলত নিশা ১১ বজালৈ খোলা থাকিব। ইয়াৰ লগতে গুৱাহাটী মহানগৰীত নিশা ২ বজালৈ ৱাইন শ্বপ আৰু আন আন ঠাই সমূহত নিশা ১২ বজালৈ খোলা ৰখাৰ সন্দৰ্ভতো চিন্তা-চৰ্চা চলোৱা বুলি উল্লেখ কৰে মুখ্যমন্ত্ৰী শৰ্মাই।
কামৰূপ আৰু বঙাইগাঁৱৰ দুখন PRFক সংৰক্ষিত বনাঞ্চল হিচাপে ঘোষণা কৰা হ’ব।
স্বায়ত্ত পৰিষদে নিৰ্ধাৰিত পুঁজিতকৈ অধিক ধনৰ নিবিদা দিব নোৱাৰিব।
২৬২ কোটি বাগিচাৰ উন্নয়নৰ বাবে মুকলি।
প্ৰাথমিক বিদ্যালয়ত নূন্যতম ৫০ গৰাকী ছাত্ৰ-ছাত্ৰী থাকিলে প্ৰধান শিক্ষকৰ পদ সৃষ্টি কৰা হ’ব।
প্ৰথমগৰাকী অকংগ্ৰেছী মুখ্যমন্ত্ৰী গোলাপ বৰবৰাৰ জন্ম শতবাৰ্ষিকী বৰ্ষজোৰাকৈ অনুষ্ঠিত কৰিব ৰাজ্য চৰকাৰে। ২৯ আগষ্টৰ পৰা বৰ্ষজোৰাকৈ পালন কৰা হ’ব।
ৰংঘৰৰ বাকৰিত কৃত্ৰিম বানৰ সমস্যা দূৰ কৰিবলৈ যাৱতীয় ব্যৱস্থা গ্ৰহণ কৰা হ’ব।
