বিগত বছৰৰ ডিচেম্বৰত একাংশ দুৰ্বৃত্তই প্ৰহাৰ কৰি হত্যা কৰা ৰঙিয়াৰ দক্ষিণ বৰদল গাঁৱৰ ২১ বছৰীয়া ধৰ্মেন্দ্ৰ নাথৰ পৰিয়ালক দিয়া প্ৰতিশ্ৰুতি পালন কৰিলে অসম বিজেপিৰ প্ৰাক্তন সভাপতি তথা ৰঙিয়া সমষ্টিৰ বিধায়ক ভৱেশ কলিতাই।
আৰ্থিক সাহায্য প্ৰদান কৰাৰ প্ৰতিশ্ৰুতি অনুসৰি আজি ভৱেশ কলিতাই দুৰ্ভগীয়া পৰিয়ালটোৰ কাষত উপস্থিত হৈ ২ লাখ ৫০ হাজাৰ টকাৰ এখন চেক প্ৰদান কৰে। বিধায়ক কলিতাই প্ৰয়াত ধৰ্মেন্দ্ৰ নাথৰ মাতৃৰ হাতত প্ৰদান কৰে চেকখন।
উল্লেখ্য যে, বিগত বছৰৰ ২৫ ডিচেম্বৰ তাৰিখে ধৰ্মেন্দ্ৰই হিমাংশু নামৰ এজন যুৱকৰ গাড়ীত খুন্দিয়াইছিল। এই সৰু কথাতে ২১ বছৰীয়া ধৰ্মেন্দ্ৰৰ ওপৰত জঁপিয়াই পৰিছিল বিজেপি নেতাসহ প্ৰায় ১১-১২ জনীয়া এটা যুৱকৰ দল।
অভিযোগ অনুসৰি এই যুৱককেইজনে মাৰপিট কৰি ধৰ্মেন্দ্ৰ নাথক পানীত দলিয়াই দিছিল। এই মাৰপিটৰ ঘটনাৰ পাছতেই নিৰুদ্দেশ হৈ আছিল ধৰ্মেন্দ্ৰ আৰু পৰৱৰ্তী সময়ত পুখুৰীত উদ্ধাৰ হয় ৰঙিয়াৰ দক্ষিণ বৰদলৰ ধৰ্মেন্দ্ৰ নাথৰ মৃতদেহ।
এই অবাঞ্চিত ঘটনাটোৰ ফলত হঠাতে পৰিয়ালটোৰ জীৱনলৈ এক অভাৱনীয় দুৰ্যোগ নামি আহিছিল। এই নৃশংস ঘটনাক লৈ ৰঙিয়াৰ লগতে ৰাজ্যৰ বিভিন্ন প্ৰান্তত হোৱা তীব্ৰ প্ৰতিবাদৰ পিছত মৃতকৰ পৰিয়ালৰ কাষত থিয় দিছিল ৰঙিয়াৰ বিধায়ক ভৱেশ কলিতা।
ইয়াৰ উপৰি মৃত ধৰ্মেন্দ্ৰ নাথৰ বাসগৃহলৈ আহিছিল খোদ মুখ্যমন্ত্ৰী ড০ হিমন্ত বিশ্ব শৰ্মাও। সেই সময়ত মুঠ ১০ লাখ টকা পৰিয়ালটোক দিম বুলি সদৰি কৰিছিল ৰাজ্যিক বিজেপিৰ প্ৰাক্তন সভাপতি ভৱেশ কলিতাই। ইতিমধ্যেই মুখ্যমন্ত্ৰীৰ ফালৰ পৰা ধৰ্মেন্দ্ৰ নাথৰ পৰিয়াললৈ ৫ লাখ টকাৰ চেক আগবঢ়োৱা হৈছে।
আজি সেই পৰিয়ালটোক কিছু সকাহ দিয়াৰ উদ্দেশ্যে মাতৃৰ হাতত বিধায়ক ভৱেশ কলিতাই পুনৰ ২ লাখ ৫০ হাজাৰ টকাৰ এখন চেক প্ৰদান কৰে।
