শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে এক সাক্ষাৎকাৰত এক বিবৃতি দিছে যিয়ে দেশখনৰ কৰ ব্যৱস্থাত এক বৃহৎ পৰিৱৰ্তন আনিব পাৰে। তেওঁ কৈছে যে যদি চৰকাৰে শুল্কৰ পৰা পৰ্যাপ্ত ধন লাভ কৰিব পাৰে, তেন্তে দেশৰ সকলো আয়কৰ আঁতৰোৱা হ’ব পাৰে।
তেওঁ কয় যে, ১৮০০ চনত আমেৰিকাই শুল্কৰ দ্বাৰা যথেষ্ট অৰ্থ অৰ্জন কৰিছিল আৰু যাৰ বাবে দেশখনক আটাইতকৈ ধনী দেশৰ ভিতৰত গণ্য কৰা হৈছিল।
সংবাদ মাধ্যমক দিয়া এক সাক্ষাৎকাৰত ট্ৰাম্পে কয় যে, ১৮৭০ চনৰ পৰা ১৯১৩ চনলৈকে আমেৰিকাত আয়কৰ নাছিল। সেই সময়ত চৰকাৰে সকলো ধন শুল্কৰ পৰা সংগ্ৰহ কৰিছিল, আৰু সেই সময়ত আমেৰিকা আছিল বিশ্বৰ আটাইতকৈ ধনী দেশ।
ট্ৰাম্পে লগতে কয় যে, তেওঁ আমেৰিকাত আকৌ এবাৰ শুল্ক ভিত্তিক অৰ্থনৈতিক আৰ্হি গ্ৰহণ কৰিব বিচাৰে। তেওঁ জোৰ দি কয় যে এই ধনৰাশি ইমানেই বেছি হ’ব পাৰে যে ই আয়কৰৰ স্থানো ল’ব পাৰে। অৱশ্যে এই পৰিৱৰ্তন কাৰ্যকৰী কৰিবলৈ কংগ্ৰেছৰ অনুমোদন প্ৰয়োজনীয় হ’ব বুলিও তেওঁ স্বীকাৰ কৰে। আচলতে ক’ৰোনা মহামাৰীৰ পিছত কৰ ব্যৱস্থা সলনি কৰাৰ প্ৰচেষ্টা আৰু অধিক তীব্ৰতৰ হৈ পৰিছে।
ইফালে ২ এপ্ৰিলত ট্ৰাম্পে ঘোষণা কৰা গধুৰ শুল্কই বিত্তীয় বজাৰত আতংকৰ সৃষ্টি কৰিছিল। ইয়াৰ বাবেই তেওঁলোকে ৯০ দিনৰ আংশিক ৰেহাই দিয়াৰ সিদ্ধান্ত লয় যদিও একে সময়তে চীনৰ ওপৰত শুল্ক ১৪৫% বৃদ্ধি কৰে।
১৯১৩ চনত আমেৰিকাৰ সংবিধানৰ ১৬ সংখ্যক সংশোধনীৰ ফলত কংগ্ৰেছক আয়কৰ আৰোপ কৰাৰ ক্ষমতা প্ৰদান কৰা হয়। বৰ্তমান আমেৰিকাৰ বহু ৰাজ্যইও নিজৰ পৰ্যায়ত আয়কৰ সংগ্ৰহ কৰে। কিন্তু ৮খন ৰাজ্য আছে – আলাস্কা, ফ্ল’ৰিডা, নিউ হামচায়াৰ, নেভাদা, চাউথ ডাকোটা, টেনেচি, টেক্সাছ আৰু ৱাইমিং, য’ত ব্যক্তিগত আয়কৰ আৰোপ কৰা নহয়। ৱাশ্বিংটন ৰাজ্যই মজুৰি বা দৰমহাৰ ওপৰত কৰ নিদিয়াৰ বিপৰীতে ২ লাখ ৭০ হাজাৰ ডলাৰৰ ওপৰৰ মূলধনী আয়ৰ ওপৰত কৰ আৰোপ কৰে।
