পেহেলগাম আক্ৰমণৰ পিছত পাকিস্তানত এক উত্তেজনাময় পৰিৱেশে বিৰাজ কৰে। পাকিস্তানে এতিয়া শংকাত ভুগিছে যে ভাৰতে যিকোনো সময়তে তেওঁলোকৰ আক্ৰমণ কৰিব পাৰে।
ইয়াৰ পৰিপ্ৰেক্ষিতত পাকিস্তানৰ ৰাষ্ট্ৰপতিয়ে ৰাষ্ট্ৰীয় বিধানসভাৰ বৈঠক আহ্বান কৰিছে। এই বৈঠক ৫ মে’ৰ সন্ধিয়া ৫ বজাত ইছলামাবাদৰ সংসদ ভৱনত অনুষ্ঠিত হ’ব।
পাকিস্তানৰ ৰাষ্ট্ৰপতি চৰকাৰে জাৰি কৰা এক আনুষ্ঠানিক বিবৃতি অনুসৰি, ইছলামিক ৰিপাব্লিক অৱ পাকিস্তানৰ সংবিধানৰ ৫৪ নং অনুচ্ছেদৰ ধাৰা (১)ৰ দ্বাৰা প্ৰদান কৰা ক্ষমতা প্ৰয়োগ কৰি ৰাষ্ট্ৰপতিয়ে ৫ মে’ সোমবাৰে সন্ধিয়া ৫:০০ বজাত ইছলামাবাদৰ সংসদ ভৱনত ৰাষ্ট্ৰীয় বিধানসভাৰ বৈঠকৰ আহ্বান কৰিছে।
ৰাষ্ট্ৰীয় বিধানসভাৰ এই বৈঠকত উপস্থিত থাকিব দেশখনৰ সকলো দলৰে নেতা। সংসদৰ এই বৈঠকত ইমৰাণ খানৰ দল পিটিআইৰ স্থিতিহে লক্ষণীয় হ’ব। পিটিআইয়ে প্ৰধানমন্ত্ৰী শ্বাহবাজ শ্বৰীফক সমৰ্থন কৰিব নে নকৰে সেইয়া জানিব পৰা যাব।
অৱশ্যে কাৰাবন্দী ইমৰাণ খানে এক বিবৃতিযোগে ভাৰতৰ বিৰুদ্ধে চৰকাৰক সমৰ্থন কৰিব বুলি কৈছিল।
পাকিস্তানত ৰাষ্ট্ৰীয় নিৰাপত্তাৰ প্ৰতি ভয়াৱহ ভাবুকি অহাত এনে জৰুৰী বৈঠক আহ্বান কৰা হয়। ৰাষ্ট্ৰপতিয়ে আহ্বান কৰা ৰাষ্ট্ৰীয় বিধানসভাৰ এই বিশেষ বৈঠকত সকলো দলৰ নেতা, নিৰাপত্তা বিশেষজ্ঞ আৰু মন্ত্ৰীসকল উপস্থিত থাকিব। এই বৈঠকত বহু গুৰুত্বপূৰ্ণ বিষয় আলোচনা হোৱাৰ আশা কৰা হৈছে, যিবোৰ বিশেষকৈ বৰ্তমানৰ পৰিস্থিতিৰ ওপৰত ভিত্তি কৰি হ’ব পাৰে।
পেহেলগাম সন্ত্ৰাসবাদী আক্ৰমণৰ পিছত ভাৰতে কঠোৰ স্থিতি গ্ৰহণ কৰি পাকিস্তানৰ সৈতে সকলো কূটনৈতিক সম্পৰ্কৰ অন্ত পেলাইছে। ইয়াত সিন্ধু জল সন্ধিৰ অন্ত পেলোৱাটোৱেই আটাইতকৈ ডাঙৰ সিদ্ধান্ত বুলি বিবেচিত হৈছে। ইয়াৰ বাবেই চুবুৰীয়া দেশখনত আলোড়নৰ সৃষ্টি হৈছে।
ইয়াৰ উপৰিও ভাৰত চৰকাৰে দেশত বসবাস কৰা সকলো পাকিস্তানী নাগৰিকৰ ভিছা বাতিল কৰি পাকিস্তানলৈ ঘূৰাই পঠিয়াইছে। ইফালে ইয়াৰ পৰিপেক্ষিতত পাকিস্তানৰ সেনা প্ৰধান অসীম মুনীৰেও ধাৰাবাহিকভাৱে বৈঠক অনুষ্ঠিত কৰি আহিছে, যাৰ পৰা স্পষ্টকৈ বুজা যায় যে পাকিস্তানে সঁচাকৈয়ে ভয়ত কঁপিছে। এই কাৰণেই তেওঁ সীমান্তত চাইৰেন স্থাপন কৰি অহৰহ ক্ষেপণাস্ত্ৰ পৰীক্ষা কৰি আছে।
