তিনিচুকীয়া জিলাৰ বৰডুমচা আৰক্ষী থানাৰ ভিতৰত তিনিজন আৰক্ষী বিষয়াই এজন যুৱকক নিৰ্মম অত্যাচাৰ কৰা ঘটনাৰ চাঞ্চল্য মাৰ নৌযাওতেই পুনৰ সেইধৰণৰ ঘটনা সংঘটিত হৈছে এইখন অসমত। এইবাৰ স্থান গহপুৰ।
পিংকু বৰা নামৰ এজন যুৱকক হাৰাশাস্তি কৰাৰ অভিযোগত হাইদৰ হুছেইন নামৰ এজন আৰক্ষী বিষয়াক নিলম্বন কৰা হৈছে। বিশ্বনাথ জিলাৰ আৰক্ষী অধীক্ষক শুভাশীষ বৰুৱাৰ নিৰ্দেশত এই পদক্ষেপ গ্ৰহণ কৰা হৈছে।
গহপুৰ মহকুমাৰ খৰানী জান গাঁৱৰ বাসিন্দা যুৱকজনক গহপুৰ থানাৰ উপ-পৰিদৰ্শক হাইদৰ হুছেইনে অমানৱীয় ব্যৱহাৰৰ কৰা বুলি জানিব পৰা গৈছে।
সংবাদ মাধ্যমৰ ব্যাপক প্ৰচাৰৰ পিছত এই ঘটনা পোহৰলৈ অহাত সমগ্ৰ বিশ্বনাথ জিলাত তীব্ৰ প্ৰতিক্ৰিয়াৰ সৃষ্টি হয়। ইয়াৰ উত্তৰত শুভাশীষ বৰুৱাই তাতক্ষণিকভাৱে ব্যৱস্থা গ্ৰহণ কৰি হুছেইনক নিলম্বনৰ নিৰ্দেশ প্ৰদান কৰে আৰু তদন্ত আৰম্ভ হয়।
গহপুৰ চক্ৰ বিষয়া প্ৰাণজিৎ লহকৰক তদন্ত কৰিবলৈ দায়িত্ব প্ৰদান কৰা হৈছে।
উল্লেখ্য যে, দিন হাজিৰা কৰা পিংকু বৰাক পিতৃ মেঘৰাজ বৰাৰ এজাহাৰৰ ভিত্তিত যোৱা ৩ মে’ত হুছেইনৰ দলে জিম্মাত লৈছিল। আৰু ইয়াৰ পিছতে তেওঁক অকথ্য নিৰ্যাতন চলোৱাৰ অভিযোগ উত্থাপন হয়।
