অতি শীঘ্ৰেই বিগত ৩ বছৰ ধৰি ৰাছিয়া আৰু ইউক্ৰেইনৰ মাজত চলি থকা যুদ্ধৰ অন্ত পৰাৰ সম্ভাৱনা। ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিয়ে তেওঁৰ সমকক্ষ ভ্লাদিমিৰ পুটিনৰ সৈতে মুখামুখিকৈ সাক্ষাৎ কৰিবলৈ সন্মত হৈছে।
এই সপ্তাহত তুৰস্কত দুয়োৰে এই বৈঠক হ’ব পাৰে। এই বৈঠকৰ আয়োজনত আমেৰিকাৰ ৰাষ্ট্ৰপতি ড’নাল্ড ট্ৰাম্পে গুৰুত্বপূৰ্ণ ভূমিকা গ্ৰহণ কৰা বুলি ধাৰণা কৰা হৈছে, কিয়নো তেওঁ জেলেনস্কিক পুটিনক সাক্ষাৎ কৰিবলৈ হেঁচা প্ৰয়োগ কৰিছিল।
এক প্ৰতিবেদন অনুসৰি, জেলেনস্কিয়ে সামাজিক মাধ্যমত পোষ্ট কৰি কয় যে, তেওঁ ১৫ মে’ত টুৰ্কিত পুটিনৰ বাবে অপেক্ষা কৰিব। এইবাৰ “সম্পূৰ্ণ আৰু স্থায়ী যুদ্ধবিৰতি”য়ে “কূটনীতিৰ বাবে প্ৰয়োজনীয় ভিত্তি” প্ৰদান কৰিব বুলিও জেলেনস্কিয়ে জনায়।
উল্লেখ্য যে, ইয়াৰ পূৰ্বে জেলেনস্কিয়ে পুটিনে যুদ্ধবিৰতিৰ বাবে সন্মতি নিদিয়ালৈকে প্ৰত্যক্ষ বৈঠক অনুষ্ঠিত নকৰাৰ ওপৰত অটল আছিল। তেওঁক সমৰ্থন কৰা ইউৰোপীয় দেশসমূহো একেটা কথাটেই অটল আছিল।
ইউক্ৰেইন আৰু ইউৰোপৰ অন্যান্য দেশসমূহে ৰাছিয়াক ১২ মে’ৰ ভিতৰত ইউক্ৰেইনৰ সৈতে ৩০ দিনৰ বাবে বিনাচৰ্তে যুদ্ধবিৰতি ঘোষণা কৰিবলৈ সময় ধৰি দিয়ে। কিন্তু যুদ্ধবিৰতিৰ প্ৰস্তাৱক আওকাণ কৰি তেওঁ ১৫ মে’ত তুৰস্কত জেলেনস্কিৰ সৈতে প্ৰত্যক্ষ আলোচনাৰ প্ৰস্তাৱ আগবঢ়ায়।
ট্ৰাম্পে পুটিনৰ আমন্ত্ৰণক সমৰ্থন কৰি জেলেনস্কিৰ ওপৰত হেঁচা বৃদ্ধি কৰি কয় যে, তেওঁ ১৫ মে’ত ৰাছিয়াৰ বিষয়াসকলৰ সৈতে হ’বলগীয়া বৈঠকত তৎক্ষণাত সন্মতি দিব লাগে। জাৰ্মানীৰ নতুন চ্যান্সেলৰ ফ্ৰেড্ৰিখ মেৰ্জে ট্ৰাম্পৰ এই পদক্ষেপক সমৰ্থন কৰে। ইয়াৰ পিছত জেলেনস্কিও ৰাছিয়াৰ ৰাষ্ট্ৰপতি ভ্লাদিমিৰ পুটিনক সাক্ষাৎ কৰিবলৈ সাজু হয়।
উল্লেখ্য যে, জেলেনস্কিয়ে নাটোৰ অংশ হোৱাৰ জোৰত ক্ষুব্ধ হৈ ৰাছিয়াই ২০২২ চনৰ ২৪ ফেব্ৰুৱাৰীত ইউক্ৰেইনক আক্ৰমণ কৰিছিল।তেতিয়াৰ পৰাই দুয়োখন দেশৰ মাজত যুদ্ধ অব্যাহত আছে। ৰাছিয়াই এতিয়ালৈকে ইয়াৰ পূৱ অংশ দখল কৰিছে, যিটো ইউক্ৰেইনৰ মুঠ মাটিকালিৰ ২০ শতাংশ। ইয়াৰ পূৰ্বে ২০১৪ চনত ইয়াৰ ক্ৰিমিয়া অঞ্চল দখল কৰিছিল।
