দক্ষিণ আমেৰিকাৰ উত্তৰ-পশ্চিম দিশে অৱস্থিত কলম্বিয়াত দেখা পোৱা গৈছে ব্যাপক নিৰ্বাচনী হিংসা। দেশখনত হ’বলগীয়া ৰাষ্ট্ৰপতি নিৰ্বাচনৰ পূৰ্বে বিৰোধীৰ প্ৰাৰ্থী মিগেল উৰিবেক দুৰ্বৃত্তই গুলীয়াই আহত কৰাৰ খবৰে চাঞ্চল্যৰ সৃষ্টি কৰিছে।
মিগেল উৰিবে কনজাৰভেটিভ ডেমোক্ৰেটিক চেণ্টাৰ পাৰ্টীৰ পৰা ৰাষ্ট্ৰপতি পদৰ প্ৰাৰ্থী। দেশখনৰ ৰাজধানী বগোটাত নিৰ্বাচনী প্ৰচাৰ চলাই থকাৰ সময়তে আক্ৰমণৰ বলি হয় বিৰোধী চিনেটৰগৰাকী। তেওঁৰ মূৰ আৰু পিঠিত আঠটাকৈ গুলীয়ে আঘাত কৰা বুলি জানিব পৰা গৈছে।
এই গুলীচালনা সংঘটিত হোৱাৰ পিছতেই নিৰ্বাচনী প্ৰচাৰ সভাত উপস্থিত থকা আৰক্ষী আৰু সমৰ্থকসকলে ততাতয়াকৈ হাস্পতালত ভৰ্তি কৰোৱায়।
ইফালে এই ঘটনাৰ পিছতেই কলম্বিয়াৰ প্ৰতিৰক্ষা মন্ত্ৰী পেড্ৰো চাঞ্চেজে প্ৰতিক্ৰিয়া প্ৰকাশ কৰি ঘটনা সম্পৰ্কত এজন লোকক গ্ৰেপ্তাৰ কৰা হৈছে আৰু তদন্ত চলি থকা বুলি জনায়। গুলীচালনাৰ ঘটনাক নিন্দনীয় আখ্যা দিয়ে ৰাষ্ট্ৰপতি কাৰ্যালয়ে।
আনহাতে আমেৰিকাই এই গুলীচালনাৰ ঘটনাক তীব্ৰ ভাষাৰে গৰিহনা দিয়ে।
