ৰে’লেৰে দীৰ্ঘ দূৰত্ব ভ্ৰমণ কৰা যাত্ৰীসকলৰ বাবে বেয়া খবৰ। চলিত বছৰৰ ১ জুলাইৰ পৰা নতুন ভাড়া কাৰ্যকৰী কৰিবলৈ সিদ্ধান্ত গ্ৰহণ কৰিছে ৰে’ল বিভাগে। এই বৰ্ধিত মূল্য দীৰ্ঘ দূৰত্ব আৰু এচি ৰে’লৰ বাবে প্ৰযোজ্য হ’ব। অৱশ্যে লোকেল ৰে’লৰ ভাড়া বৃদ্ধি কৰা নহয় বুলি জানিব পৰা গৈছে।
আনহাতে একে সময়তে মাহেকীয়া পাছৰ ওপৰত ইয়াৰ কোনো প্ৰভাৱ নপৰে। মাহিলী ছিজন টিকট (এম এছ টি) কেৱল পুৰণি ৰেটত উপলব্ধ হ’ব।
সূত্ৰ অনুসৰি ৰে’লৱেই যাত্ৰীসকলৰ ওপৰত নূন্যতম প্ৰভাৱ পেলাই সেৱাৰ উন্নতিৰ লক্ষ্যৰে এই পৰিৱৰ্তন কৰিছে।
নতুন শুল্ক অনুসৰি ৫০০ কিলোমিটাৰ পৰ্যন্ত সাধাৰণ দ্বিতীয় শ্ৰেণীৰ কোনো পৰিৱৰ্তন নহ’ব যদিও ৫০০ কিলোমিটাৰৰ অধিক দূৰত্বৰ বাবে প্ৰতি কিলোমিটাৰত আধা পইচাকৈ ভাড়া বৃদ্ধি কৰা হ’ব। আনহাতে, মেইল/এক্সপ্ৰেছ (নন-এচি) ৰে’লত প্ৰতি কিলোমিটাৰত ১ পইচা বৃদ্ধি পাব। এচি ক্লাছত প্ৰতি কিলোমিটাৰত ২ পইচা বৃদ্ধি কৰা হ’ব।
মাত্ৰ কিছু দিন পূৰ্বে ৰে’ল মন্ত্ৰী অশ্বিনী বৈষ্ণৱে কৈছিল যে বিভিন্ন ৰে’লত বিভিন্ন শিতানৰ ভাড়া তাত প্ৰদান কৰা সা-সুবিধাৰ ওপৰত ভিত্তি কৰি লোৱা হয় আৰু বিভিন্ন ধৰণৰ যাত্ৰী শ্ৰেণীৰ বাবে বিভিন্ন ৰে’ল সেৱাৰ ব্যৱস্থা কৰা হয়।
সংসদত এক প্ৰশ্নৰ উত্তৰত বৈষ্ণৱে কৈছিল যে ভাৰতীয় ৰে’লৱেই ভ্ৰমণৰ খৰচ, খৰচ, যাত্ৰীৰ ব্যয়সাধ্যতা, অন্যান্য পৰিবহণ পদ্ধতিৰ পৰা আৰ্থ-সামাজিক দিশ আদিৰ প্ৰতি লক্ষ্য ৰাখি ভাড়া নিৰ্ধাৰণ কৰে।
