যুদ্ধবিৰতি সন্দৰ্ভত বৰ্তমান ইজৰাইল-হামাছৰ আলোচনা চলি আছে। শেহতীয়াকৈ যেতিয়া ফ্ৰান্স আৰু কানাডাৰ দৰে দেশসমূহে পেলেষ্টাইনক স্বাধীন ৰাষ্ট্ৰ হিচাপে স্বীকৃতি দিয়াৰ কথা কৈছিল, তেতিয়া এনে লাগিছিল যে হয়তো ইয়াৰ ফলত ইজৰাইলৰ ওপৰত কিছু হেঁচা পৰিব।
এই পৰিস্থিতিয়ে দুবছৰ ধৰি চলি থকা ইজৰাইল-হামাছ যুদ্ধত এক সুনিৰ্দিষ্ট সমাধান বিচাৰি উলিওৱা হ’ব বুলি আশাৰ সৃষ্টি কৰিছিল। কিন্তু এতিয়া ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ এক নিৰ্দেশে এই সকলো আশাক স্তব্ধ কৰি তুলিছে।
দৰাচলতে নেতান্যায়াহুৱে ইজিপ্তৰ সীমান্তলৈকে গাজা ষ্ট্ৰিপ সম্পূৰ্ণৰূপে সামৰিক দখলত অনুমোদন জনাইছে। খবৰ অনুসৰি, যোৱা এবছৰত ইজৰাইলে আৰু দুখন দেশৰ কেইবা কিলোমিটাৰ এলেকা দখল কৰিছে। ইজৰাইলৰ এই কাৰ্যক লৈ আন্তঃৰাষ্ট্ৰীয় মঞ্চত উদ্বেগ প্ৰকাশ কৰা হৈছে।
এক প্ৰতিবেদন অনুসৰি, ২০২৪ চনৰ ডিচেম্বৰৰ পৰা ইজৰাইলে ছিৰিয়াৰ দক্ষিণ অংশত প্ৰায় ৪০০ কিলোমিটাৰ বাফাৰ জ’ন ঘোষণা কৰিছে। এই অঞ্চলটো ইজৰাইলৰ লগত সংলগ্ন। ছিৰিয়া চৰকাৰে পুনৰ এই অঞ্চলটো নিয়ন্ত্ৰণ কৰিবলৈ ব্যৰ্থ হৈছে। ইয়াত ইজৰাইলৰ সেনাই সম্পূৰ্ণৰূপে নিয়োজিত হৈ টহল দি আছে। ইজৰাইলে এই পদক্ষেপক নিজৰ নিৰাপত্তা নীতিৰ অংশ বুলি অভিহিত কৰিছে যদিও সমালোচকসকলে কয় যে ই ভূখণ্ডৰ সাৰ্বভৌমত্বৰ প্ৰত্যক্ষ উলংঘা।
ইয়াৰ উপৰি হিজবুল্লাহৰ বিৰুদ্ধে অভিযানৰ অংশ হিচাপে ইজৰাইলে লেবাননৰ সীমান্তৰ ভিতৰৰ ৫ কিলোমিটাৰ পৰ্যন্ত এলেকা নিয়ন্ত্ৰণ কৰিছে। ইয়াত ইজৰাইলৰ সৈন্য উপস্থিত থকাৰ লগতে অঞ্চলটোত সাধাৰণ নাগৰিকৰ চলাচলতো প্ৰভাৱ পৰিছে।
ইজৰাইলে ইয়াক সুৰক্ষামূলক ব্যৱস্থা বুলি অভিহিত কৰিছে যদিও লেবাননে ইয়াক আন্তঃৰাষ্ট্ৰীয় নিয়ম উলংঘা বুলি অভিহিত কৰিছে। দুয়োখন দেশৰ মাজত সংঘাতৰ সম্ভাৱনা আৰু অধিক বৃদ্ধি পাইছে। শেহতীয়াকৈ ইজৰাইলে দক্ষিণ লেবাননতো কেইবাটাও আক্ৰমণ সংঘটিত কৰিছে।
আকৌ ইজৰাইলে পেলেষ্টাইনৰো ১২ কিলোমিটাৰ ভূমি দখল কৰিছে। ইয়াৰ ভিতৰত পশ্চিম পাৰৰ বহু গাঁও আৰু অঞ্চল অন্তৰ্ভুক্ত। এই সমগ্ৰ সম্প্ৰসাৰণৰ সময়ছোৱাত ইজৰাইলে পেলেষ্টাইনী জনসংখ্যাক পিছুৱাই নিয়াৰ বিপৰীতে নতুন ইহুদী বসতি নিৰ্মাণৰ গতিও বৃদ্ধি পাইছে। এতিয়া ইজৰাইলৰ চকু গাজাৰ ওপৰত। প্ৰায় ৪১ কিলোমিটাৰ দৈৰ্ঘ্যৰ গাজা ষ্ট্ৰিপত এতিয়ালৈকে সৰ্বাধিক সামৰিক চাপ অব্যাহত আছে।
