প্ৰৱল ইচ্ছাশক্তি আৰু সাহস থাকিলে মানুহে সকলো কাম অনাসায়ে কৰিব পাৰে। এই কথাকে যেন প্ৰতিপন্ন কৰিলে অসমৰ এজন ছাত্ৰই। সাধাৰণ ঘৰৰ পৰাই যেন আকাশ চুৱাৰ পথ প্ৰশস্ত হৈছে ছাত্ৰজনৰ।
কামৰূপ জিলাৰ কমলপুৰৰ এখন ভিতৰুৱা গাঁৱৰ পৰা টৰেন্টোলৈ যোৱাৰ বাট মুকলি হৈছে ছাত্ৰজনৰ। ছাত্ৰজনৰ নাম হৈছে অৰ্ণৱ কাকতি। কমলপুৰৰ বৰুৱাজানি গাঁৱৰ অনিল কাকতি আৰু নমিতা কাকতিৰ পুত্ৰ হৈছে অৰ্ণৱ কাকতি।
শেহতীয়াকৈ কানাডাৰ টৰেন্টো বিশ্ববিদ্যালয়ত গৱেষণা কৰাৰ সুযোগ লাভ কৰিছে ছাত্ৰজনে। আগশাৰীৰ বিশ্ববিদ্যালয়খনত কৰ্কট ৰোগৰ গৱেষণা কৰাৰ বাবে জলপানী লাভ কৰিছে অৰ্ণৱে।
সৰুৰে পৰা কৰ্কট ৰোগৰ ওপৰত অধ্যায়ণ কৰাৰ প্ৰবল ইচ্ছা আছিল অৰ্ণৱ কাকতিৰ । সেই ইচ্ছা শক্তিৰ বাবেই এতিয়া অৰ্ণৱ কাকতিয়ে টৰেন্টো বিশ্ববিদ্যালয়ত এই সুৱৰ্ণ সুযোগ লাভ কৰিলে।
ইফালে, অৰ্ণৱ কাকতি এই সফলতাত গৌৰৱ অনুভৱ কৰিছে পিতৃ-মাতৃ তথা কমলপুৰ অঞ্চলৰ ৰাইজে। গাঁৱৰ ৰাইজে একত্ৰিত হৈ অৰ্ণৱৰ সফলতাৰ বাবে নামঘৰত নাম-প্ৰসংগ কৰিছে।
