ফ্ৰান্সত চলি থকা ৰাজনৈতিক অচলাৱস্থাৰ মাজতে মঙলবাৰে ৰাজধানী পেৰিছ আৰু ইয়াৰ আশে-পাশে থকা ৯টা মছজিদৰ বাহিৰত গাহৰিৰ ছিন্ন মু*ণ্ড উদ্ধাৰ হোৱাৰ পিছতে আলোড়নৰ সৃষ্টি হৈছে। ইয়াৰে ৫টাত ফ্ৰান্সৰ ৰাষ্ট্ৰপতি ইমানুৱেল মেক্ৰনৰ নাম লিখা আছিল। এই ঘটনাৰ আঁৰত কোন আছে সেয়া এতিয়াও স্পষ্ট হোৱা নাই যদিও ফ্ৰান্সৰ কৰ্তৃপক্ষই দেশখনৰ মুছলমান সম্প্ৰদায়ক সম্পূৰ্ণ নিৰাপত্তাৰ আশ্বাস দিছে।
ইউৰোপৰ ভিতৰতে সৰ্বাধিক মুছলমান জনসংখ্যা ফ্ৰান্সত আছে, ইয়াৰ সংখ্যা ৬০ লাখতকৈও অধিক। ইছলামত গাহৰিৰ মাংস খোৱা নিষিদ্ধ। শেহতীয়াকৈ ফ্ৰান্সত মুছলমান বিৰোধী আৱেগ দ্ৰুতগতিত বিয়পি পৰিছে।
আনহাতে, পেৰিছৰ আৰক্ষী অধীক্ষক লৰেণ্ট নুনেজে কয় যে, এই কাণ্ড ফ্ৰান্সক অস্থিৰ কৰাৰ বাবে বিৰোধীৰ ষড়যন্ত্ৰ হ’ব পাৰে আৰু বৰ্তমান দেশখনে আৰ্থিক আৰু ৰাজনৈতিক সংকটৰ সৈতে যুঁজি থকাৰ বাবে বিদেশী হস্তক্ষেপৰ সম্ভাৱনা নুই কৰিব নোৱাৰি। যদিও তেওঁ কোনো দেশৰ নাম পোনপটীয়াকৈ উল্লেখ কৰা নাছিল, তথাপিও তেওঁৰ ইংগিত আছিল ৰাছিয়াৰ প্ৰতি, যিয়ে বিগত সময়তো ফ্ৰান্সত অস্থিৰতা বিয়পাবলৈ চেষ্টা কৰি আহিছে।
মে’ মাহত ইহুদীসকলৰ প্ৰাৰ্থনা স্থান আৰু হ’ল’কাষ্টৰ স্মৃতিসৌধত সেউজীয়া ৰং কৰাৰ পিছত তিনিজন ছাৰ্বিয়ান নাগৰিকক “বিদেশী শক্তি”ৰ সৈতে সম্পৰ্ক থকাৰ অভিযোগত গ্ৰেপ্তাৰ কৰা হৈছিল। পেৰিছৰ অভিযুক্ত কাৰ্যালয়ে জনোৱা মতে, পেৰিছৰ মছজিদৰ বাহিৰত ৪টা গাহৰিৰ মূৰ আৰু ৰাজধানীৰ বাহিৰৰ মছজিদত ৫টা গাহৰিৰ মূৰ উদ্ধাৰ কৰা হৈছে। ইয়াত আৰু কোৱা হৈছে যে এটা ঠাইত ফ্ৰান্সৰ ৰাষ্ট্ৰপতি ইমানুৱেল মেক্ৰনৰ উপাধি নীলা ৰং কৰা হৈছিল।
