শেহতীয়াকৈ মাৰ্কিন ৰাষ্ট্ৰপতি ড’নাল্ড ট্ৰাম্পে গাজাত শান্তি প্ৰতিষ্ঠাৰ বাবে এক প্ৰস্তাৱ জাৰি কৰিছিল, যাক পাকিস্তানেও পূৰ্ণ সমৰ্থন কৰিছিল। লগতে গাজাৰ পৰিকল্পনাত পাকিস্তানে আমেৰিকাক ১০০% সমৰ্থন কৰিব বুলিও ট্ৰাম্পে দাবী কৰে।
ট্ৰাম্পৰ সৈতে টান লাভ কৰিবলৈ শ্বাহবাজ শ্বৰীফে তেওঁৰ পৰিকল্পনাক ন্যায্যতা প্ৰদান কৰিছিল যদিও পাকিস্তানী জনসাধাৰণে তেওঁৰ সিদ্ধান্তৰ বিৰোধিতা কৰিছে। ৰাজহুৱা বিৰোধিতাৰ সন্মুখীন হৈ শ্বাহবাজ চৰকাৰে এতিয়া ট্ৰাম্পৰ প্ৰস্তাৱৰ ওপৰত ইউ টাৰ্ণ লোৱা যেন দেখা গৈছে।
পাকিস্তানৰ সংবাদ মাধ্যমৰ এক প্ৰতিবেদন অনুসৰি, বৈদেশিক মন্ত্ৰী ইছহাক দাৰে ট্ৰাম্পৰ ২০ দফীয়া শান্তি প্ৰস্তাৱৰ পৰা পাকিস্তানক আঁতৰাই ৰাখিছিল আৰু ইয়াক আমেৰিকাৰ নথি বুলি অভিহিত কৰিছে। ইফালে, ট্ৰাম্পে দাবী কৰে যে, পাকিস্তানৰ প্ৰধানমন্ত্ৰী শ্বাহবাজ শ্বৰীফ আৰু সেনা প্ৰধান আছিম মুনিৰে এই শান্তি চুক্তিৰ পক্ষত আছে।
গাজাত যুদ্ধবিৰতিৰ বাবে ট্ৰাম্পৰ নতুন প্ৰস্তাৱক ভাৰত, চীন, ৰাছিয়াকে ধৰি আঠখন আৰব আৰু মুছলমান সংখ্যাগৰিষ্ঠ দেশে প্ৰশংসা কৰিছে। এই দেশসমূহৰ ভিতৰত পাকিস্তানে এতিয়া এই বিষয়ত ইউ টাৰ্ণ কৰা যেন লাগে।
বৈদেশিক মন্ত্ৰী ইছহাক দাৰে কয় যে, ট্ৰাম্পৰ পৰিকল্পনাত টেকন’ক্ৰেটৰ নেতৃত্বত এখন স্বতন্ত্ৰ পেলেষ্টাইন চৰকাৰ গঠন কৰা হৈছে, যাৰ তদাৰক হৈছে বেছিভাগ পেলেষ্টাইনীৰে গঠিত আন্তঃৰাষ্ট্ৰীয় সংস্থা। গাজালৈ পাকিস্তানী সৈন্য প্ৰেৰণৰ সন্দৰ্ভত তেওঁ কয় যে এই সিদ্ধান্ত শীৰ্ষ নেতৃত্বই ল’ব।
