বাংলাদেশক বৃহৎ আঘাত আন্তঃৰাষ্ট্ৰীয় মুদ্ৰা নিধি চমুকৈ আই এম এফৰ। দেশত নতুন চৰকাৰ গঠন নোহোৱালৈকে ঋণৰ ষষ্ঠ কিস্তি মুকলি নকৰাৰ কথা স্পষ্ট কৰি দিছে সংগঠনটোৱে।
বিগত বৰ্ষৰ অভ্যুত্থানৰ পিছত গঠন হোৱা অন্তৱৰ্তীকালীন চৰকাৰখন বৰ্তমান বাংলাদেশত ক্ষমতাত আছে, আনহাতে অহা বছৰত বাংলাদেশত নিৰ্বাচন অনুষ্ঠিত হোৱাৰ কথা। গতিকে আই এম এফৰ এই সিদ্ধান্তই দেশৰ অৰ্থনীতিত প্ৰভাৱ পেলাব পাৰে।
২০২২ চনত অৰ্থনৈতিক চাপৰ মাজতে বাংলাদেশে আই এম এফৰ সহায় বিচাৰিছিল। ২০২৩ চনৰ জানুৱাৰী মাহত সংস্থাটোৱে ৪.৭ বিলিয়ন ডলাৰৰ পেকেজত অনুমোদন জনাইছিল, যিটো পিছলৈ ৫.৫ বিলিয়ন ডলাৰলৈ বৃদ্ধি কৰা হৈছিল।
এই পৰ্যন্ত দেশখনে মুঠ ৩.৬ বিলিয়ন ডলাৰৰ পাঁচটা কিস্তি লাভ কৰিছে। ৮০ কোটি ডলাৰ (প্ৰায় ৬,৭২০ কোটি ₹)ৰ ষষ্ঠ কিস্তি মুকলি কৰিব লাগিছিল যদিও বৰ্তমান আই এম এফে ইয়াক ৰখাই ৰাখিছে।
আই এম এফে কয় যে নতুন চৰকাৰৰ সৈতে আলোচনাৰ অন্ততহে পৰৱৰ্তী ঋণৰ কিস্তি মুকলি কৰা হ’ব। আগন্তুক চৰকাৰখনে যাতে বৰ্তমানৰ অৰ্থনৈতিক সংস্কাৰৰ কাৰ্যসূচী অব্যাহত ৰাখিব বিচাৰে সেয়া নিশ্চিত কৰিব বিচাৰিছে সংগঠনটোৱে। নতুন চৰকাৰৰ নীতি সলনি হ’ব পাৰে বুলি চিন্তিত আই এম এফে, গতিকে বেছি সোনকালে ধন মুকলি কৰিব নিবিচাৰে।
বাংলাদেশ বেংকৰ গৱৰ্ণৰ ড০ আহছান এইচ মনছুৰে দেশৰ বৈদেশিক মুদ্ৰাৰ মজুত সুস্থিৰ আৰু ডলাৰৰ হাৰৰ উঠা-নমা হোৱা নাই বুলি উল্লেখ কৰে। তেওঁ কয় যে আই এম এফৰ সমৰ্থন প্ৰয়োজনীয়, কিন্তু এতিয়া কিস্তি নাপালেও দেশে নিজৰ অৰ্থনৈতিক অৱস্থা পৰিচালনা কৰিব পাৰে।
২৯ অক্টোবৰত আই এম এফৰ এটা প্ৰতিনিধি দল ঢাকাত উপস্থিত হ’ব। এই দলটোৱে দুসপ্তাহ সময় চৰকাৰী প্ৰতিষ্ঠানৰ সৈতে বৈঠকত মিলিত হ’ব আৰু প্ৰতিবেদন প্ৰস্তুত কৰিব। এই প্ৰতিবেদনে কিস্তি মুকলি কৰা হ’ব নে নহয় সেইটো নিৰ্ধাৰণ কৰিব। বৰ্তমান বাংলাদেশৰ বৈদেশিক মুদ্ৰাৰ মজুত ৩২.১৪ বিলিয়ন ডলাৰ, আৰু ৰপ্তানি আৰু প্ৰবাসীৰ আয়ৰ উন্নতি হৈছে।
২০২৪ চনত শ্বেখ হাছিনাৰ চৰকাৰৰ বিৰুদ্ধে হোৱা অভ্যুত্থানৰ পিছত বাংলাদেশত মহম্মদ ইউনুছৰ নেতৃত্বত এখন অন্তৱৰ্তীকালীন চৰকাৰ গঠন হয়। এতিয়া ২০২৬ চনত সাধাৰণ নিৰ্বাচন অনুষ্ঠিত হোৱাৰ সম্ভাৱনা আছে। আই এম এফৰ এই সিদ্ধান্তই নতুন চৰকাৰৰ অৰ্থনৈতিক নীতিত যথেষ্ট প্ৰভাৱ পেলাব পাৰে।
