লোকসভা নিৰ্বাচনত প্ৰতিদ্বন্দ্বিতা কৰাৰ বাবে বয়সৰ যোগ্যতাৰ মাপকাঠী আৰু অধিক হ্ৰাস কৰাৰ দাবী আম আদমি পাৰ্টিৰ ৰাজ্যসভাৰ সাংসদ ৰাঘৱ চাড্ডাই। তেওঁ লগতে দেশৰ ৰাজনীতিত ‘বৃদ্ধতন্ত্ৰ’ একেবাৰে ভাল নাপায় বুলিও উল্লেখ কৰে।
বৃহস্পতিবাৰে ৰাজ্যসভাত পৰিসংখ্যাৰ ওপৰত আলোকপাত কৰি আপ সাংসদগৰাকীয়ে লোকসভাত যুৱ ৰাজনীতিবিদৰ সংখ্যা সময়ৰ লগে লগে কেনেদৰে হ্ৰাস পাইছে সেই বিষয়ে বিস্তৃতৰূপত উল্লেখ কৰে।
তেওঁ বয়সৰ সীমা হ্ৰাস কৰাৰ প্ৰস্তাৱো আগবঢ়ায় যাতে অধিক যুৱ ৰাজনীতিবিদ সংসদত থাকে।
উল্লেখ্য যে, বৰ্তমান লোকসভা নিৰ্বাচনৰ প্ৰাৰ্থী হ’বলৈ হ’লে নূন্যতম বয়স ২৫ বছৰ। চাড্ডাই এই বয়সৰ সীমা ২১ বছৰলৈ হ্ৰাস কৰাৰ দাবী জনায়।
দেশত মুঠ জনসংখ্যাৰ ৬৫ শতাংশ ৩৫ বছৰৰ তলৰ। ৫০ শতাংশতকৈ অধিক লোকৰ বয়স ২৫ বছৰৰ তলৰ। এই কথা কৈ চাড্ডাই দেশৰ ৰাজনীতিবিদৰ বয়সৰ তুলনা কৰা দেখা যায়।
পৰিসংখ্যা উত্থাপন কৰি আপৰ সাংসদগৰাকীয়ে কয় যে দেশৰ প্ৰথমখন লোকসভাত ২৬ শতাংশ সাংসদ ৪০ বছৰৰ তলৰ আছিল। যোৱা লোকসভাত এই সংখ্যা মাত্ৰ ১২ শতাংশলৈ হ্ৰাস পায়। দেশখন যুৱ শক্তিৰে ভৰি পৰিছে, কিন্তু আমাৰ নিৰ্বাচিত প্ৰতিনিধিসকল বয়সীয়াল হৈ আহিছে।
যুৱ প্ৰতিনিধিৰ সংখ্যা হ্ৰাস পোৱাৰ সম্ভাৱ্য কাৰণসমূহ ব্যাখ্যা কৰি উচ্চ সদনৰ সাংসদগৰাকীয়ে কয় যে ইয়াৰ এটা কাৰণ হ’ব পাৰে যে ৰাজনীতিক ‘বেয়া বৃত্তি’ হিচাপে দেখা যায়। তেওঁৰ মতে, পিতৃ-মাতৃয়ে সন্তানৰ কথা ভাবিলেই তেওঁলোকক ডাক্তৰ, অভিযন্তা, ক্ৰীড়াবিদ, বিজ্ঞানী ইত্যাদি কৰি তুলিব বিচাৰে। কিন্তু কেতিয়াও শিশুটিক ৰাজনীতিবিদ হিচাপে চাব নিবিচাৰে।
যুৱ সমাজক ৰাজনীতিৰ প্ৰতি আকৃষ্ট কৰিবলৈ সাংসদগৰাকীয়ে লগতে বয়সৰ সময়সীমা ২৫ৰ পৰা ২১লৈ হ্ৰাস কৰিবলৈ দাবী জনায়।
