আজিৰে পৰা ন-ৰূপত উদ্ভাসিত হ’ব সোণাপুৰৰ জুবিনক্ষেত্ৰ। মুখ্যমন্ত্ৰীৰ নিৰ্দেশমৰ্মে আজিৰে পৰা আৰম্ভ হ’ব জুবিন ক্ষেত্ৰৰ চাৰিসীমাৰ দেৱাল নিৰ্মাণৰ কাম। প্ৰশাসন, জুবিন গাৰ্গ ফেন ক্লাৱৰ ব্যৱস্থাপনাত স্থানীয় ৰাইজে চিকুণাইছে জুবিন ক্ষেত্ৰ।
সোণাপুৰৰ জুবিন ক্ষেত্ৰত আৰম্ভ হ’ল স্বচ্চতা অভিযান। সকলো ক্ষুদ্ৰ ব্যৱসায়ীকে নিজৰ নিজৰ দোকান আঁতৰাবলৈ নিৰ্দেশ দিছে প্ৰশাসনে। সীমাৰ ৱাল নিৰ্মাণৰ বাবে আঁতৰবলৈ দিয়া হৈছে জুবিন ক্ষেত্ৰৰ দোকানসমূহ। যাৰ বাবে এতিয়া জুবিন ক্ষেত্ৰত থকা অস্থায়ী ব্যৱসায়িক প্ৰতিষ্ঠানসমূহ ইতিমধ্যে আঁতৰাই পঠিওৱা হৈছে।
ইয়াৰ লগতে পুৱাৰ ভাগতে জুবিন ক্ষেত্ৰত উপস্থিত হৈছে গৰিমা শইকীয়া গাৰ্গ। তেওঁ তদাৰক কৰিছে জুবিন ক্ষেত্ৰৰ সকলো ব্যৱস্থাপনা। স্থানীয় ৰাইজ আৰু জুবিন গাৰ্গ ফেন ক্লাবৰ সদস্যই ইতিমধ্যে আৰম্ভ কৰিছে জুবিন ক্ষেত্ৰত স্বচ্ছতা অভিযান।
৯ ফেব্ৰুৱাৰীত মুখ্যমন্ত্ৰীয়ে জুবিন ক্ষেত্ৰৰ দেৱাল নিৰ্মাণৰ কাম আৰম্ভ কৰাৰ বাবে নিৰ্দেশ জাৰি কৰাৰ পিছতেই তৎপৰ হৈ পৰিছে ডিমৰীয়া সমজিলা প্ৰশাসনো। যাৰ এতিয়াৰে পৰা অনুৰাগীয়ে নতুন ৰূপত দেখিবলৈ পাব হাৰ্টথ্ৰৱ জুবিন গাৰ্গৰ অন্তিম শয়নস্থলী। ইতিমধ্যে নিৰ্মাণ শ্ৰমিকৰ দলো জুবিন ক্ষেত্ৰত উপস্থিত হৈ আৰম্ভ কৰিছে যাৱতীয় কাম কাজ।
উল্লেখ্য যে, কিছুদিন পূৰ্বে এগৰাকী কেব চালকে জুবিন ক্ষেত্ৰৰ বিশৃংখলময় পৰিস্থিত দেখি সামাজিক মাধ্যমত এক নিজৰ ক্ষোভ উজাৰিছিল। জুবিন ক্ষেত্ৰৰ শেহতীয়া পৰিৱেশ দেখি আজিৰ পৰা জুবিন ক্ষেত্ৰলৈ নাহো লগতে পৰ্যটকৰ সন্মুখত লজ্জিত হৈ নিজকে অসমীয়া বুলি পৰিচয় দিবলৈলাজ লাগিছে বুলি সামাজিক মাধ্যমত এটি ভিডিঅ আপলোড কৰিছিল কেব চালকজনে।
এই ভিডিঅটিৰ প্ৰতিক্ৰিয়া স্বৰূপে গৰিমা শইকীয়া গাৰ্গেও জুবিন ক্ষেত্ৰৰ পৰিষ্কাৰ-পৰিচ্ছন্নতাক লৈ প্ৰশ্ন উত্থাপন কৰিছিল। ইয়াৰ পিছতে পৰিষ্কাৰ কৰিবলৈ সাজু হৈছে প্ৰশাসন।
