অৱশেষত অন্ত পৰিল আইচিচি টি-২০ বিশ্বকাপ ২০২৬ত ভাৰত বনাম পাকিস্তানৰ খেলক লৈ বিতৰ্ক। পাকিস্তান চৰকাৰে ১ ফেব্ৰুৱাৰীত ভাৰতৰ বিৰুদ্ধে খেলখন বৰ্জন কৰাৰ কথা ঘোষণা কৰিছিল যদিও ৯ ফেব্ৰুৱাৰীত এই বিষয়টোৰ সমাধান হয়।
বিগত ৮ ফেব্ৰুৱাৰীত লাহোৰত অনুষ্ঠিত ত্ৰিপাক্ষিক বৈঠকত পাকিস্তান ক্ৰিকেট ব’ৰ্ড (পিচিবি) আৰু বাংলাদেশ ক্ৰিকেট ব’ৰ্ডৰ কিছু দাবী মানি লয় আন্তঃৰাষ্ট্ৰীয় ক্ৰিকেট পৰিষদে। ইয়াৰ ফলত টি-২০ বিশ্বকাপ ২০২৬ক লৈ সপ্তাহজুৰি চলি থকা জল্পনা-কল্পনা আৰু বিভ্ৰান্তিৰ অন্ত পৰে। এতিয়া ভাৰত-পাকিস্তানৰ এই বৃহৎ মেচখনে মাত্ৰ আনুষ্ঠানিক ঘোষণাৰ বাবে অপেক্ষা কৰি আছে।
এই বিতৰ্কিত বিষয়টোৰ মধ্যস্থতা কৰিবলৈ ব’ৰ্ডে নিৰ্বাচিত কৰে আইচিচিৰ উপ অধ্যক্ষ তথা ছিংগাপুৰৰ প্ৰতিনিধি ইমৰাণ খোৱাজাক। ইমৰানক আইচিচিৰ ভিতৰত এজন প্ৰভাৱশালী ব্যক্তি হিচাপে গণ্য কৰা হয় আৰু ব’ৰ্ডৰ সহযোগী সদস্য সঞ্চালক হিচাপে ভোটাধিকাৰ লাভ কৰে। পিচিবিক প্ৰতিনিধিত্ব কৰি মহছিন নাকৱীয়ে অংশগ্ৰহণ কৰাৰ লগতে বাংলাদেশৰ প্ৰাক্তন খেলুৱৈ আমিনুল ইছলামে এই বৈঠকত অংশগ্ৰহণ কৰে। ইয়াৰ পিছতে কেইবাসপ্তাহ ধৰি চলি অহা অনিশ্চয়তাৰ অন্ত পৰে।
আইচিচি আৰু পিচিবিৰ মাজত এক অনানুষ্ঠানিক আলোচনা হয়। গ্ৰুপ এৰ আটাইতকৈ ডাঙৰ মেচ ভাৰত-পাকিস্তান মেচখন মঞ্চস্থ কৰাৰ বাবে আইচিচিয়ে প্ৰচেষ্টা তীব্ৰতৰ কৰি তুলিলে। আই চি চিৰ উপ অধ্যক্ষ ইমৰাণ খোৱাজা আৰু এমিৰেটছ ক্ৰিকেট ব’ৰ্ডৰ অধ্যক্ষ মুবাছিৰ উছমানীয়ে পিচিবিৰ মুৰব্বী মহছিন নাকভি আৰু পিএছএলৰ মুৰব্বী ছলমান নাছিৰ, নকভিৰ জ্যেষ্ঠ উপদেষ্টাৰ সৈতে কেইবাটাও ফোন আৰু বৈঠকত মিলিত হয়। এই প্ৰচেষ্টা এসপ্তাহ পূৰ্বে আৰম্ভ হৈছিল আৰু পাকিস্তান চৰকাৰৰ এই টুইটৰ পিছত তীব্ৰতৰ হৈ পৰে।
পিচিবিয়ে আনুষ্ঠানিকভাৱে আইচিচিলৈ পত্ৰ লিখি “ফৰ্চ মেজৰ” দফাটোৰ আমন্ত্ৰণ কৰিবলৈ অনুৰোধ জনায়। ভাৰতৰ বিৰুদ্ধে খেল বৰ্জনৰ ন্যায্যতা প্ৰদানৰ প্ৰয়াস আছিল এয়া। আই চি চি সন্তুষ্ট নহৈ সুনিৰ্দিষ্ট কাৰণ আৰু সকলো সম্ভাৱ্য সমাধান শেষ হোৱাৰ প্ৰমাণ দাবী কৰে।আইচিচিৰ নিযুক্ত মধ্যস্থতাকাৰী ইমৰাণ খোৱাজা লাহোৰত উপস্থিত হৈ নকভি আৰু বাংলাদেশ ক্ৰিকেট ব’ৰ্ডৰ সভাপতি ইছলামৰ সৈতে বৈঠকত মিলিত হয়। পাঁচ ঘণ্টাৰো অধিক সময়ৰ এই বৈঠকত পাকিস্তানে কেইবাটাও দাবী উত্থাপন কৰিছিল যদিও কোনো পক্ষই ৰাজহুৱাভাৱে ফলাফল প্ৰকাশ কৰা নাছিল।
পিচিবিৰ মুৰব্বী মহছিন নাকভিয়ে পুনৰ প্ৰধানমন্ত্ৰী শ্বাহবাজ শ্বৰীফৰ সৈতে সাক্ষাৎ কৰি লাহোৰত অনুষ্ঠিত হোৱা আলোচনা আৰু বিচিবি, এছএলচি, আৰু এমিৰেটছ ক্ৰিকেট ব’ৰ্ডে কৰা আবেদনৰ বিষয়ে অৱগত কৰে। শ্ৰীলংকাৰ ৰাষ্ট্ৰপতি অনুৰ কুমাৰ ডিছানায়াকেৰ সৈতেও ফোনযোগে কথা পাতি শ্বৰীফে পাকিস্তানৰ বিৰুদ্ধে খেলখন খেলাৰ অনুৰোধ পুনৰবাৰ উল্লেখ কৰে। পিছত পাকিস্তান চৰকাৰে স্পষ্ট কৰি দিয়ে যে এই বৰ্জন উঠাই লোৱাৰ উদ্দেশ্য হৈছে “ক্ৰিকেটৰ মনোভাৱক সুৰক্ষা দিয়া আৰু অংশগ্ৰহণকাৰী সকলো দেশতে এই বিশ্বব্যাপী খেলৰ ধাৰাবাহিকতাক সমৰ্থন কৰা”।
