পাৰস্য উপসাগৰত চলি থকা যুদ্ধৰ মাজতে ওলাইছে এক ডাঙৰ খবৰ। আমেৰিকাৰ আটাইতকৈ ডাঙৰ আৰু বিপজ্জনক যুদ্ধজাহাজ ইউ এছ এছ জেৰাল্ড আৰ ফৰ্ড (চিভিএন-৭৮)ত সংঘটিত হৈছে অগ্নিকাণ্ড। লোহিত সাগৰত নিয়োজিত এই পাৰমাণৱিক শক্তিচালিত যুদ্ধ জাহাজখনক ইৰাণৰ বিৰুদ্ধে আক্ৰমণৰ ঘাটি হিচাপে ব্যৱহাৰ কৰা হৈছিল।
আমেৰিকাৰ নৌসেনাই দাবী কৰিছে যে, শত্ৰুতাৰ বাবে এই অগ্নিকাণ্ড সংঘটিত হোৱা নাই। এই অগ্নিকাণ্ডই জাহাজখনৰ প্ৰচলনত কোনো ক্ষতি কৰা নাই। সম্প্ৰতি এই বিমানবাহী জাহাজখন সুকলমে চলি আছে। এই ঘটনাত ২ জন আমেৰিকান জোৱান আঘাতপ্ৰাপ্ত হোৱাৰ খবৰ পোৱা গৈছে। বৰ্তমান তেওঁলোক চিকিৎসাধীন হৈ আছে।
ইজৰাইলৰ সমান্তৰালকৈ ইৰাণৰ বিৰুদ্ধে যুদ্ধ চলাই আছে আমেৰিকাই। আমেৰিকাই এই বিমানবাহী জাহাজখন এয়াৰবেছ হিচাপে ব্যৱহাৰ কৰি আছে। আমেৰিকাৰ সেনাই ছ’চিয়েল মিডিয়াত এটা পোষ্ট শ্বেয়াৰ কৰি কয় যে, ১২ মাৰ্চত ইউ এছ এছ জেৰাল্ড আৰ ফৰ্ড (চিভিএন-৭৮) বিমানত অগ্নিকাণ্ড সংঘটিত হৈছিল। যুদ্ধজাহাজখনৰ মূল কাপোৰ ধোৱা ঘৰত সংঘটিত হয় এই অগ্নিকাণ্ড। অৱশ্যে এই বিমানবাহী জাহাজখন কাৰ্যক্ষম হৈ আছে। এই ঘটনাত আহত দুজন নাৱিক আৰু আঘাতৰ বাবে চিকিৎসাধীন হৈ আছে। তেওঁলোকৰ অৱস্থা সুস্থিৰ।
এই জাহাজ বিশ্বৰ আটাইতকৈ দামী বিমানবাহী জাহাজ আৰু আমেৰিকাৰ এক গুৰুত্বপূৰ্ণ নৌসেনা বাহিনী। আমেৰিকাৰ নৌসেনাৰ চিভিএন-৭৮ ফৰ্ড ক্লাছৰ প্ৰথমখন জাহাজ। ৩৮ সংখ্যক ৰাষ্ট্ৰপতি জেৰাল্ড ফৰ্ডৰ নামেৰে ইয়াৰ নামকৰণ কৰা হৈছে। ইয়াৰ দৈৰ্ঘ্য ৩৩৩ মিটাৰ আৰু ওজন এক লাখ টন। ই পাৰমাণৱিক চালিত ছুপাৰকেৰিয়াৰ। ইয়াত দুটা এ ১ বি নিউক্লিয়াৰ ৰিয়েক্টৰ আৰু ইলেক্ট্ৰ’মেগনেটিক লঞ্চ চিষ্টেম আছে। ইয়াত ৯০খনতকৈও অধিক যুঁজাৰু বিমান কঢ়িয়াব পাৰি। ইয়াৰ আনুমানিক ব্যয় ১৩ বিলিয়ন ডলাৰ। ২০১৭ চনত আমেৰিকাই ইয়াক বিশ্বৰ আগত উন্মোচন কৰিছিল।
