আমেৰিকা আৰু ইৰাণৰ মাজত উত্তেজনা পুনৰ বৃদ্ধি পোৱা যেন পৰিলক্ষিত হৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক কঠোৰ সতৰ্কবাণী জাৰি কৰি কয় যে যদি কোনো চৰ্ত অবিহনে ৪৮ ঘণ্টাৰ ভিতৰত ইৰাণে হৰমুজ জলদ্বীপ সম্পূৰ্ণৰূপে মুকলি নকৰে, তেন্তে আমেৰিকাই ইৰাণৰ প্ৰধান বিদ্যুৎ কেন্দ্ৰসমূহত আক্ৰমণ কৰিব।
ট্ৰাম্পে নিজৰ বিবৃতিত স্পষ্টভাৱে উল্লেখ কৰিছে যে, যদি ইৰাণে সময়সীমাৰ ভিতৰত কোনো ব্যৱস্থা গ্ৰহণ নকৰে তেন্তে আমেৰিকাই নিজৰ শক্তিৰ আন্তঃগাঁথনিক লক্ষ্য কৰি ল’ব। তেওঁ লগতে কয় যে এই কাৰ্য্য সৰ্ববৃহৎ বিদ্যুৎ কেন্দ্ৰৰ পৰা আৰম্ভ হ’ব আৰু অন্যান্য স্থানলৈও সম্প্ৰসাৰিত হ’ব। ইৰাণ আৰু আমেৰিকাৰ সম্পৰ্ক ইতিমধ্যে উত্তেজিত হৈ পৰাৰ সময়ত এই বক্তব্য প্ৰকাশ কৰিছে।
হৰমুজ জলদ্বীপ হৈছে বিশ্বৰ অন্যতম গুৰুত্বপূৰ্ণ সাগৰীয় পথ। বিশ্বব্যাপী তেল যোগানৰ এক বৃহৎ অংশ ইয়াৰ মাজেৰে পাৰ হৈ যায়। তাত যিকোনো বিঘিনি হ’লে বিশ্ব অৰ্থনীতি আৰু তেলৰ মূল্যত প্ৰভাৱ পৰিব পাৰে।
মাত্ৰ এদিন পূৰ্বে আমেৰিকাই ইৰাণৰ তেল ক্ৰয়ৰ ওপৰত থকা নিষেধাজ্ঞা উঠাই লোৱাৰ সিদ্ধান্ত লৈছিল। পশ্চিম এছিয়াৰ সংঘাতৰ মাজতে আমেৰিকাই ইয়াক এক বৃহৎ ইউ টাৰ্ণ বুলি বিবেচনা কৰিছে। উল্লেখযোগ্য যে ইৰাণৰ আক্ৰমণৰ আশংকাত তেল আৰু অন্যান্য শক্তি সম্পদ কঢ়িয়াই অনা বৃহৎ সংখ্যক জাহাজ হৰমুজ জলদ্বীপত আৱদ্ধ হৈ আছে।
সংযুক্ত আৰব আমিৰশ্বাহীৰ নেতৃত্বত ২২খন দেশে যৌথ বিবৃতিযোগে ইৰাণক শেহতীয়াকৈ হৰমুজ জলদ্বীপত বাণিজ্যিক জাহাজৰ ওপৰত আক্ৰমণৰ তীব্ৰ সমালোচনা কৰে। এই দেশসমূহে আন্তঃৰাষ্ট্ৰীয় আইন আনুগত্য আৰু বিশ্বৰ সামুদ্ৰিক সুৰক্ষা নিশ্চিত কৰাৰ বাবে আবেদন জনায়।
এক বিবৃতিটোত কোৱা হৈছে যে উপসাগৰীয় অঞ্চলত নিৰস্ত্ৰ বাণিজ্যিক জাহাজত ইৰাণৰ আক্ৰমণ, অসামৰিক আন্তঃগাঁথনিৰ ওপৰত আক্ৰমণ আৰু হৰমুজ জলদ্বীপক ফলপ্ৰসূভাৱে বন্ধ কৰাৰ প্ৰচেষ্টাক আমি তীব্ৰ গৰিহণা দিছো। নেতাসকলে অঞ্চলটোত ক্ৰমাৎ বৃদ্ধি পোৱা উত্তেজনাক লৈ গভীৰ উদ্বেগ প্ৰকাশ কৰি ইৰাণক তৎক্ষণাত আক্ৰমণ বন্ধ কৰিবলৈ, সামুদ্ৰিক পথত বাধা দিয়া বন্ধ কৰিবলৈ আৰু ৰাষ্ট্ৰসংঘৰ নিৰাপত্তা পৰিষদৰ ২৮১৭ নং প্ৰস্তাৱ মানি চলিবলৈ দাবী জনায়।
তেওঁলোকে কয় যে সামুদ্ৰিক যাত্ৰাৰ স্বাধীনতা আন্তঃৰাষ্ট্ৰীয় আইনৰ এক মৌলিক নীতি আৰু ইয়াৰ বাধাই বিশ্ব শান্তি আৰু নিৰাপত্তাৰ প্ৰতি ভাবুকি কঢ়িয়াই আনিছে। যৌথ বিবৃতিটোত ব্ৰিটেইন, ফ্ৰান্স, জাৰ্মানী, ইটালী, নেদাৰলেণ্ড, জাপান, কানাডা, দক্ষিণ কোৰিয়া, নিউজিলেণ্ড, ডেনমাৰ্ক, লাটভিয়া, স্লোভেনিয়া, ফিনলেণ্ড আদি দেশসমূহে স্বাক্ষৰ কৰে।
