আগন্তুক পশ্চিমবংগ বিধানসভা নিৰ্বাচনৰ বাবে ৰাজনৈতিক কাৰ্যকলাপ তীব্ৰতৰ হৈ পৰিছে। ৰাজনৈতিক দলসমূহে সক্ৰিয়ভাৱে প্ৰচাৰ চলাইছে। ইফালে বিজেপিয়ে প্ৰকাশ কৰিছে পঞ্চম প্ৰাৰ্থীৰ তালিকা।
বিজেপিৰ কেন্দ্ৰীয় নিৰ্বাচনী সমিতিয়ে পঞ্চম তালিকাৰ ৫ জন প্ৰাৰ্থীৰ নাম ঘোষণা কৰিছে। আনহাতে দলটোৱে তিনিটা সমষ্টিৰ প্ৰাৰ্থীৰ সংশোধিত তালিকা প্ৰকাশ কৰিছে।বিজেপিয়ে প্ৰকাশ কৰা প্ৰাৰ্থীৰ তালিকা অনুসৰি, অনুপম বিশ্বাসে কল্যাণীৰ পৰা, ডম ডম নৰ্থৰ পৰা সৌৰভ ছিকদাৰ, মধ্যমগ্ৰামৰ পৰা অনিন্দ্ৰদ্যা ৰাজু বেনাৰ্জী, আৰু উলুবেৰিয়া ইষ্টৰ পৰা ৰুদ্ৰপ্ৰসাদ বেনাৰ্জীয়ে প্ৰতিদ্বন্দ্বিতা কৰিব। আনহাতে দলটোৱে তিনিটা বিধানসভা সমষ্টিৰ সংশোধিত তালিকাও প্ৰকাশ কৰিছে। কৌশিক সিদ্ধাৰ্থক বাচিৰহাট নৰ্থ, বিষ্ণুপুৰৰ পৰা অভিজিত চৰ্দাৰ, বেহালা ইষ্টৰ পৰা শংকৰ ছিকদাৰক মনোনীত কৰা হৈছে।
পশ্চিমবংগৰ ২৯২টা বিধান সভা সমষ্টিৰ বাবে বিজেপিৰ প্ৰাৰ্থী ঘোষণা। প্ৰথমখন তালিকাত ১৪৪ গৰাকী প্ৰাৰ্থীৰ তালিকা প্ৰকাশ কৰে দলটোৱে। দ্বিতীয় তালিকাত ১১১ জন, তৃতীয় তালিকাত ১৯ জন, চতুৰ্থ তালিকাত ১৩ জন প্ৰাৰ্থী আছিল।
পশ্চিম বংগত শাসকীয় টিএমচি আৰু বিজেপিৰ মাজত প্ৰত্যক্ষ প্ৰতিদ্বন্দ্বিতা হোৱাৰ সম্ভাৱনা আছে। বিধানসভা নিৰ্বাচনৰ পৰিপ্ৰেক্ষিতত দেশৰ বিভিন্ন প্ৰান্তৰ পৰা বিজেপিৰ জ্যেষ্ঠ নেতাসকলে বংগ ভ্ৰমণ কৰিছে। প্ৰধানমন্ত্ৰী নৰেন্দ্ৰ মোদীয়ে ৫ এপ্ৰিলত বংগৰ কুচবিহাৰত এক সভাত ভাষণ দিব। ২০২৬ চনৰ বংগ বিধানসভা নিৰ্বাচনৰ বাবে এইটোৱেই হ’ব প্ৰধানমন্ত্ৰী মোদীৰ প্ৰথম ৰেলী। বিজেপিৰ বাবে কোচবিহাৰৰ বিশেষ তাৎপৰ্য আছে, কিয়নো ২০২১ চনত তাত থকা ৯খন বিধানসভাৰ আসনৰ ভিতৰত ৮খন আসন লাভ কৰিছিল।
নিৰ্বাচন আয়োগৰ তথ্য অনুসৰি, পশ্চিম বংগত ভোটদান দুটা পৰ্যায়ত অনুষ্ঠিত হ’ব। প্ৰথম পৰ্যায়ৰ ২৩ এপ্ৰিলত আৰু দ্বিতীয় পৰ্যায়ৰ ২৯ এপ্ৰিলত অনুষ্ঠিত হ’ব। অহা ৪ মে’ত ঘোষণা কৰা হ’ব নিৰ্বাচনৰ ফলাফল। ইফালে বিধানসভা নিৰ্বাচনৰ মাজতে বংগ ভ্ৰমণ কৰি আছে জ্যেষ্ঠ ৰাজনৈতিক নেতাসকলে। বিভিন্ন দলৰ নেতাৰ মাজতো এক বাকযুদ্ধ দেখা গৈছে।
