সোমবাৰে শ্বিলঙৰ জৱাহৰলাল নেহৰু ষ্টেডিয়ামত অনুষ্ঠিত হোৱা চলিত বৰ্ষৰ ডুৰাণ্ড কাপৰ ছেমিফাইনেলত শ্বিলং লাজঙৰ বিৰুদ্ধে ৩-০ গ’লত জয় লাভ কৰি প্ৰতিযোগিতাখনৰ ফাইনেলত প্ৰৱেশ কৰিছে নৰ্থ-ইষ্ট ইউনাইটেডে।
২০২৩ বৰ্ষৰ এই প্ৰতিযোগিতাখনত নৰ্থ-ইষ্ট ইউনাইটেডে ছেমিফাইনেলত পৰাস্ত হৈ প্ৰতিযোগিতাখনৰ পৰা বাহিৰ হৈছিল। কিন্তু দলটোৱে এইবাৰ যথেষ্ট উন্নতমানৰ প্ৰদৰ্শন আগবঢ়াই ফাইনেলত প্ৰৱেশ কৰিবলৈ সক্ষম হৈছে।
নৰ্থ-ইষ্ট ইউনাইটেডৰ হৈ প্ৰথমাৰ্ধৰ ১৩ মিনিটত থই সিঙে গ’ল কৰি দলক অগ্ৰগতি প্ৰদান কৰে। ইয়াৰ প্ৰায় ২০ মিনিটৰ পাছত আজাৰাইয়ে গ’ল স্কৰাৰৰ ৰূপত নিজৰ নাম সংযোজন কৰে। প্ৰথম অৱস্থাত অফছাইড বুলি গণ্য কৰা হৈছিল যদিও পিছত ৰেফাৰী ক্রিষ্টাল জনে তেওঁৰ সহায়কৰ সৈতে আলোচনা কৰি এই সিদ্ধান্ত বাতিল কৰি গ’লটোক মান্যতা প্ৰদান কৰে।
মেচখনৰ অন্তিম মুহূৰ্তত বিকল্প খেলুৱৈ হিচাপে খেলপথাৰত অৱতীৰ্ণ হোৱা পাৰ্থীৱ গগৈয়ে নিজৰ দক্ষতাৰে তথা একক প্ৰচেষ্টাৰে তৃতীয়টো গ’ল কৰে আৰু এইদৰে নৰ্থ-ইষ্ট ইউনাইটেডে ঘৰুৱা দল শ্বিলং লাজঙৰ বিৰুদ্ধে ৩-০ গ’লৰ ব্যৱধানত জয়ী হয়।
