কাছাৰৰ লক্ষীপুৰৰ কামৰেংগাত সংঘটিত হৈছে এক মৰ্মান্তিক ঘটনা। চিৰি নৈত গা ধুবলৈ গৈ সলিল সমাধি ঘটিল স্বামী-স্ত্ৰীৰ। কৰুণ মৃত্যুক সাৱটি লোৱা দুজনক যগ্গু কল আৰু অঞ্জনা কল বুলি জানিব পৰা গৈছে।
জানিব পৰা মতে, দিন হাজিৰ কৰা স্বামী-স্ত্ৰী দুয়োগৰাকীয়ে যোৱা দুদিন পূৰ্বে কাম শেষ কৰি চিৰি নৈত গা ধুবলৈ গৈছিল। স্বামী-স্ত্ৰীয়ে নৈত গা ধুই থাকোতেই হঠাৎ নৈৰ পানীত ডুব যায় অঞ্জনা কল। লগে লগে পত্নীক বচাবলৈ গৈ স্বামীও ডুব যায় পানীত।
ভয়ংকৰ এই ঘটনাৰ পাছত আৰক্ষী আৰু এছডিআৰএফ বাহিনীয়ে দুই স্বামী স্ত্ৰীৰ সন্ধান বিচাৰি নৈত অভিযান চলায় যদিও বিফল হয়। কিন্তু সোমবাৰে ঘটনাস্থলীৰ পৰা কেইবা কিলোমিটাৰ দূৰত লক্ষীপুৰ কাংগালী বস্তীত নৈৰ পৰা উদ্ধাৰ হয় দুই স্বামী-স্ত্ৰীৰ মৃতদেহ।
স্থানীয় লোকসকলে মৃতদেহ দুটা ওপঙি উঠা দেখি আৰক্ষীক খবৰ দিয়াত আৰক্ষীৰ লোক ঘটনাস্থলীত উপস্থিত হৈ মৃতদেহ দুটা উদ্ধাৰ কৰে।
ইয়াৰ পিছতেই দুয়োগৰাকীৰ মৃতদেহ মৰণোত্তৰ পৰীক্ষাৰ বাবে শিলচৰ মেডিকেল কলেজলৈ প্ৰেৰণ কৰা হয়।
ইনপুট : বিক্ৰম দাস (শিলচৰ)
