সাম্প্ৰদায়িক তুষ্টিকৰণ আৰু ধৰ্মীয় মেৰুকৰণেৰে অসমক অস্থিৰ কৰাৰ বাবে বিগত জুলাই মাহৰ পৰাই কংগ্ৰেছ দলে অভিসন্ধি ৰচনা কৰি পৰিকল্পিতভাৱে অসমৰ জাতীয় জীৱনলৈ সংকট নমাই অনাৰ অপচেষ্টাত লিপ্ত হোৱা বুলি গুৰুতৰ অভিযোগ উত্থাপন কৰিছে বিজেপিৰ ৰাজ্যিক সভাপতি ভৱেশ কলিতাই।
আজি ভাৰতীয় জনতা পাৰ্টি চমুকৈ বিজেপিৰ মুখ্য কাৰ্যালয়ত আয়োজিত এক সংবাদ মেলত দলটোৰ সভাপতি ভৱেশ কলিতাই কংগ্ৰেছৰ লগতে তেওঁলোকৰ সহযোগী দলসমূহকো তীব্ৰ সমালোচনা কৰে।
ভৱেশ কলিতাই কয়, ‘বিগত লোকসভা নিৰ্বাচনত এক বিশেষ সম্প্ৰদায়ৰ ব্যাপক সমৰ্থন লাভ কৰাৰ পিছত কংগ্ৰেছ দলটোৱে তেওঁলোকৰ পৰম্পৰাগত মিঞা বাংলাদেশী তুষ্টিকৰণৰ ৰাজনীতি ত্বৰান্বিত কৰাৰ ফলত ৰাজ্যখনত এক শ্বাসৰুদ্ধকৰ পৰিৱেশ সৃষ্টি হৈছে। কংগ্ৰেছ দলৰ সমৰ্থক এইসকল অতি সাম্প্ৰদায়িক লোকৰ বাবে আজি অসমৰ জীয়ৰী-বোৱাৰী মুকলি মনেৰে ওলাব নোৱাৰাৰ পৰিৱেশৰ সৃষ্টি হৈছে। স্কুল-টিউচনৰ পৰা উভতি অহা কনমানি ছাত্ৰী ধৰ্ষণৰ সন্মুখীন হৈছে। এইসকল লোকে বসবাস কৰা অঞ্চলত শিক্ষকতা কৰা অসমীয়া জীয়ৰী-বোৱাৰীয়ে দৈনক নিৰ্যাতনৰ মুখামুখি হ’ব লগা হৈছে’।
বিজেপি সভাপতিগৰাকীয়ে লগতে কয় যে এইসকলৰ বিৰুদ্ধে কঠোৰ স্থিতি গ্ৰহণ কৰি আইনী ব্যৱস্থা গ্ৰহণ কৰা অসমৰ মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰখনক সমালোচনা কৰাতেই ক্ষান্ত নাথাকি কংগ্ৰেছ নেতৃত্বাধীন ইণ্ডি এলায়েন্সৰ নেতাসকলে সংখ্যালঘু তুষ্টিকৰণৰ ৰাজনীতিৰ চূড়ান্ত পৰ্যায়লৈ গৈ মুখ্যমন্ত্ৰীজনৰ বিৰুদ্ধে গোচৰ তৰিবলৈও কুণ্ঠাবোধ নকৰিলে।
কংগ্ৰেছ নেতৃত্বাধীন ইণ্ডি এলায়েন্সৰ নেতাসকলৰ এনেকুৱা কাৰ্যৰ জৰিয়তে দল কেইটা যে দুৰ্ধৰ্ষ অপৰাধী, ধৰ্ষণকাৰী, চোৰাং ব্যৱসায়ীৰ পক্ষত নিজৰ স্বৰূপ উদঙাই দিয়া বুলিও ভৱেশ কলিতাই মন্তব্য কৰে।
আনহাতে আ এক বিবৃতিৰ জৰিয়তে প্ৰদেশ বিজেপিয়ে পশ্চিম বংগৰ মুখ্যমন্ত্ৰী মমতা বেনাৰ্জীয়ে অসম জ্বলাব বুলি হুংকাৰ দিয়া বক্তব্যক তীব্ৰ ভৎৰ্সনা কৰে।
সাংবিধানিকভাৱে নিৰ্বাচিত এগৰাকী মুখ্যমন্ত্ৰীৰ এনেকুৱা বক্তব্যক ধিক্কাৰ দিয়াৰ কোনো ভাষা নাই বুলি বিবৃতিটোত উল্লেখ কৰি কয়, ‘মুখ্যমন্ত্ৰী ড০ হিমন্ত বিশ্ব শৰ্মাৰ বিৰুদ্ধে এজাহাৰ দিয়া ইণ্ডি এলায়েন্সৰ নেতাসকলে এতিয়া চূড়ান্ত অসম বিৰোধী মন্তব্য ৰখা পশ্চিম বংগৰ মুখ্যমন্ত্ৰীগৰাকীৰ বিৰুদ্ধে এজাহাৰ দিবলৈ সাহস হ’বনে? ইয়াতেই অসমৰ এই বিৰোধী নেতাসকলৰ প্ৰকৃত স্বৰূপ ওলাই পৰিল’।
