ফ্ৰান্সৰ পেৰিছত চলি থকা পেৰালিম্পিক ২০২৪ৰ বেডমিণ্টনত স্বৰ্ণ পদক মেচত ডেনিয়েল বেথেলক পৰাস্ত কৰি ভাৰতীয় পেৰা খেলুৱৈ নীতেশ কুমাৰে লাভ কৰিলে স্বৰ্ণ পদক। নীতেশে যুক্তৰাজ্যৰ বেথেলক পৰাস্ত কৰি সোণৰ পদক লাভ কৰে।
এইদৰে নীতেশৰ জৰিয়তে ভাৰতে লাভ কৰে নৱমটো পদক। নীতেশৰ উজ্বল প্ৰদৰ্শনৰ বাবেই মেডেল তালিকাত এতিয়া ২টা স্বৰ্ণ পদক আছে ভাৰতৰ।
উল্লেখ্য যে, মাত্ৰ ১৫ বছৰ বয়সত ৰেল দুৰ্ঘটনাত এখন ভৰি হেৰুৱাইছিল নীতেশে। ২০১৫ চনত এক অনাকাংক্ষিত দুৰ্ঘটনাত এখন ভৰি হেৰুওৱা নীতেশে জীৱন যুঁজত হাৰ নামানি নিজৰ লক্ষ্যত উপনীত হয়।
১৯৯৪ চনৰ ৩০ ডিচেম্বৰত ৰাজস্থানৰ বাস কীৰ্তনত জন্মগ্ৰহণ কৰিছিল নীতেশে। কিন্তু ক্ৰীড়াৰ প্ৰতি তেওঁৰ যথেষ্ট আকৰ্ষণ আছিল। ভৰি হেৰুৱাৰ পিছতো তেওঁ ক্ৰীড়া অনুশীলন অব্যাহত ৰাখিছিল।
এইদৰে ২০১৬ চনত তেওঁ আন্তঃৰাষ্ট্ৰীয় পৰ্যায়ত অভিষেক ঘটায়। মাত্ৰ কেইবছৰমানৰ ভিতৰতে তেওঁ অনুৰাগীৰ মাজত যথেষ্ট নাম উজলাইছিল। ২০১৭ চনত তেওঁ আইৰিছ পেৰা বেডমিণ্টন আন্তঃৰাষ্ট্ৰীয় প্ৰতিযোগিতাত খিতাপ দখল কৰে।
২০১৯ চনত নীতেশ হাৰিয়ানাৰ এখন ক’ৰ্টত বেডমিণ্টনৰ জ্যেষ্ঠ প্ৰশিক্ষক হিচাপে দায়িত্ব গ্ৰহণ কৰিছিল। ইয়াৰ অধীনত বহু যুৱক-যুৱতীক প্ৰশিক্ষণো দিছিল। সেই বছৰতে বেচেলত অনুষ্ঠিত হোৱা বিশ্ব চেম্পিয়নশ্বিপত পুৰুষৰ একক আৰু ডাবলছত স্বৰ্ণ পদক লাভ কৰে নীতিশে। ডাবলছত তেওঁৰ সহযোগী আছিল তৰুণ ধিলন।
ইয়াৰ ঠিক ৩ বছৰৰ পাছত ২০২২ চনত টকিঅ’ত অনুষ্ঠিত হোৱা বিশ্ব চেম্পিয়নশ্বিপত তৰুণে ৰূপৰ পদক লাভ কৰে। একে সময়তে এইবাৰ ২০২৪ চনত তেওঁ বিশ্ব চেম্পিয়নশ্বিপত একক মেচত ব্ৰঞ্জৰ পদক লাভ কৰিছিল।
