পেৰিছ পেৰালিম্পিক ২০২৪ত সোণৰ পদক অৰ্জন কৰা নৱদীপ সিং আৰু প্ৰধানমন্ত্ৰী মোদীৰ এক বিশেষ ভিডিঅ’ ছচিয়েল মিডিয়াত যথেষ্ট ভাইৰেল হৈ পৰিছে। এই ভিডিঅ’টোত প্ৰধানমন্ত্ৰী মোদীক নৱদীপ সিঙৰ ইচ্ছা পূৰণ কৰিবলৈ মাটিত বহি থকা দেখিবলৈ পোৱা গৈছে।
পেৰিছ পেৰালিম্পিক ২০২৪ ভাৰতৰ বাবে আছিল অতি বিশেষ। ইয়াত ভাৰতে মুঠ ২৯ টা পদক অৰ্জন কৰে, যাৰ ভিতৰত আছে ৭ টা সোণ, ৯ টা ৰূপ আৰু ১৩ টা ব্ৰঞ্জ, যি বৰ্তমানলৈকে ভাৰতৰ সৰ্বশ্ৰেষ্ঠ প্ৰদৰ্শন।
প্ৰধানমন্ত্ৰী নৰেন্দ্ৰ মোদীয়ে পেৰালিম্পিকত পদক বিজয়ীসকলৰ সৈতে বাৰ্তালাপ কৰে আৰু তেওঁলোকক অভিনন্দন জনায়৷ এই সময়ছোৱাতেই, স্বৰ্ণজয়ী নৱদীপ সিঙৰ সৈতে প্ৰধানমন্ত্ৰীৰ এক বিশেষ ভিডিঅ’ ছচিয়েল মিডিয়াত যথেষ্ট ভাইৰেল হৈ পৰিছে।
নৱদীপ সিঙে F41 শ্ৰেণীত সোণৰ পদক অৰ্জন কৰে আৰু তেওঁ প্ৰধানমন্ত্ৰী মোদীৰ বাবে এটা টুপী লৈ আনে। তেওঁ নিজ হাতেৰেই প্ৰধানমন্ত্ৰী মোদীক এই টুপীটো পিন্ধাব বিচাৰিছিল। কম উচ্চতাৰ হোৱা বাবে প্ৰধানমন্ত্ৰী মোদীয়ে তেওঁৰ ইচ্ছা পূৰণ কৰিবলৈ মাটিত বহি লয় আৰু তাৰ পিছত নৱদীপে তেওঁক টুপী পিন্ধাই দিয়ে। ইয়াৰ উপৰিও, প্ৰধানমন্ত্ৰী মোডীয়ে নৱদীপ সিঙক তেওঁৰ অটোগ্ৰাফও দিয়ে।
পেৰিছ পেৰালিম্পিক ২০২৪ত, নৱদীপ সিঙে F41 শ্ৰেণীত ৪৭.৩২ মিটাৰ দলিয়াইছিল। একে সময়তে, ইৰাণৰ চাদেগে জেভলিনত ৪৭.৬৪ মিটাৰ দলিয়াইছিল, কিন্তু নিয়ম ভংগ কৰাৰ বাবে তেওঁক অযোগ্য ঘোষণা কৰা হৈছিল। যাৰ বাবে নৱদীপ সিঙে সোণৰ পদক লাভ কৰে। বিগত বৰ্ষত তেওঁ চতুৰ্থ স্থানত আছিল।
