নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে এয়াৰ মাৰ্শ্বাল অমৰ প্ৰীত সিঙক পৰৱৰ্তী বায়ুসেনাৰ মুৰব্বী হিচাপে নিযুক্তি দিছে। বৰ্তমান অমৰ প্ৰীত সিঙে উপ-মুখ্য পদত কাৰ্যনিৰ্বাহ কৰি আছে।
২০২৪ চনৰ ৩০ ছেপ্টেম্বৰৰ বিয়লিৰ পৰা কাৰ্যকৰী হোৱাকৈ তেওঁ বায়ুসেনাৰ পৰৱৰ্তী মুৰব্বী হিচাপে এয়াৰ চিফ মাৰ্শ্বালৰ পদ গ্ৰহণ কৰিব।
আচলতে চলিত ছেপ্তেম্বৰ মাহৰ ৩০ তাৰিখে অৱসৰ ল’ব বৰ্তমানৰ বায়ুসেনাৰ মুখ্য এয়াৰ চিফ মাৰ্শ্বাল বিবেক ৰাম চৌধুৰীয়ে। বিবেক ৰাম চৌধুৰীৰ ঠাইত এতিয়া অমৰ প্ৰীত সিঙক এই পদত অধিষ্ঠিত কৰোৱা হৈছে।
এয়াৰ মাৰ্শ্বাল অমৰ প্ৰীত সিঙৰ বিষয়ে জানো আহক
ৰাষ্ট্ৰীয় সংবাদ মাধ্যমত প্ৰকাশ পোৱা খবৰ অনুসৰি ভাৰতীয় বায়ুসেনাত অমৰ প্ৰীত সিঙৰ যাত্ৰা আৰম্ভ হৈছিল ১৯৮৪ চনৰ পৰা। ১৯৮৪ চনৰ ২১ ডিচেম্বৰত ভাৰতীয় বায়ুসেনাৰ যুঁজাৰু শাখাত যোগদান কৰে।
প্ৰতিষ্ঠিত চেণ্ট্ৰেল এয়াৰ কমাণ্ড (CAC)ৰ পদ গ্ৰহণ কৰাৰ পূৰ্বে তেওঁ ইষ্টাৰ্ণ এয়াৰ কমাণ্ডৰ জ্যেষ্ঠ এয়াৰ ষ্টাফ অফিচাৰ হিচাপে কাৰ্যনিৰ্বাহ কৰিছিল।
নেশ্যনেল ডিফেন্স একাডেমী, ৱেলিংটনস্থিত ডিফেন্স চাৰ্ভিচেছ ষ্টাফ কলেজ আৰু নেশ্যনেল ডিফেন্স কলেজৰ প্ৰাক্তন ছাত্ৰ অমৰ প্ৰীত সিঙে মিগ-২৭ স্কাৱাড্ৰনৰ ফ্লাইট কমাণ্ডাৰ আৰু কমাণ্ডিং অফিচাৰৰ লগতে এয়াৰ বেছ কমাণ্ডিং এয়াৰ অফিচাৰকে ধৰি গুৰুত্বপূৰ্ণ ভূমিকা পালন কৰি আহিছে।
কেৰিয়াৰৰ সময়ছোৱাত অমৰ প্ৰীত সিঙে ২০১৯ চনত অতি বিষিষ্ট সেৱা পদক আৰু ২০২৩ চনত পৰম বিশিষ্ট সেৱা পদক লাভ কৰিছে। কেৱল এয়াই নহয়, ২০২৩ চনৰ ১ ফেব্ৰুৱাৰিত ভাৰতীয় বায়ুসেনাৰ ৪৭ সংখ্যক উপ-মুখ্য পদৰ দায়িত্ব গ্ৰহণ কৰে অমৰ প্ৰীত সিঙে।
