দুৰ্গোৎসৱ সুচাৰুৰূপে সম্পন্ন কৰিবলৈ সাজু হৈছে কাছাৰ জিলা প্ৰশাসন। দুৰ্গা পূজাৰ দশমীৰ দিনটোত অৰ্থাত প্ৰতিমা বিসৰ্জনৰ দিনা যাতে কোনো ধৰণৰ অঘটন নঘটে তাৰ বাবে সমগ্ৰ জিলাখনতে ড্ৰাই ডে ঘোষণা কৰিছে প্ৰশাসনে।
ইয়াৰ উপৰি পূজাৰ সময়ছোৱাত বিভিন্ন নিষেধাজ্ঞা জাৰি কৰিছে কাছাৰৰ উপায়ুক্ত মৃদুল যাদৱে। কাছাৰ জিলাত দুৰ্গোৎসৱ সুন্দৰ, শৃংখলাবদ্ধ আৰু শান্তিপূৰ্ণভাৱে উদযাপন কৰাৰ উদ্দেশ্যে কাছাৰ জিলা প্ৰশাসনে জিলাখনৰ বিভিন্ন পূজা সমিতিৰ বিষয়ববীয়াৰ সৈতে শিলচৰত এক বৈঠকত মিলিত হয়।
দুৰ্গা পূজা উদযাপনৰ সময়ত প্ৰয়োজনীয় ব্যৱস্থা গ্ৰহণ কৰাৰ সিদ্ধান্ত লোৱা হয়। আন বছৰৰ দৰে দুৰ্গোৎসৱ সমিতিসমূহে দুৰ্গা পূজা সুচাৰুৰূপে আৰু শৃংখলাবদ্ধভাৱে অনুষ্ঠিত কৰাৰ বাবে প্ৰয়োজনীয় সকলো ব্যৱস্থা কৰাৰ নিৰ্দেশ দিছে মৃদুল যাদৱে।
বিদ্যুৎ, পানী আদি যোগান ধৰাৰ বাবে সংশ্লিষ্ট বিভাগৰ পূৰ্ব অনুমোদন লোৱাৰ নিৰ্দেশ দিয়ে উপায়ুক্তগৰাকীয়ে। ইপিনে কাছাৰ জিলা প্ৰশাসনে কণ্ট্ৰ’ ল ৰুম মুকলি কৰিব বুলিও জানিবলৈ দিয়ে।
লগতে সকলো পূজা সমিতিৰ সৈতে এক সুকীয়া বৈঠক অনুষ্ঠিত কৰি পূজাৰ সময়ছোৱাত যাতায়াতৰ ব্যৱস্থা মসৃণ কৰি তোলাৰ ক্ষেত্ৰত জনসাধাৰণে কোনো ধৰণৰ অশান্তি নোহোৱাকৈ পূজা উপভোগ কৰাৰ ক্ষেত্ৰত দৃষ্টি ৰখাৰ নিৰ্দেশ দিয়া হৈছে।
ইপিনে আৰক্ষী অধীক্ষক নোমাল মাহাত্তাই সকলো পূজা সমিতিক নিজ নিজ স্বেচ্ছাসেৱকক আই-কাৰ্ড আৰু মহিলা আৰু পুৰুষৰ বাবে পৃথক প্ৰৱেশ ব্যৱস্থা, অগ্নিনিৰ্বাপক ব্যৱস্থা, CCTV আদিৰ ব্যৱস্থা কৰিবলৈ নিৰ্দেশ দিছে। তেওঁ ঘাইপথ এলেকাৰ পৰা পূজা মাচুল সংগ্ৰহ, পথৰ ক্ষতি নকৰাকৈ মণ্ডপ নিৰ্মাণ আৰু উপযুক্ত অনুমতি ল’বলৈ অনুৰোধ জনায়।
ইপিনে প্ৰতিমা বিসৰ্জনৰ দিনা ড্ৰাই ডে থাকিব বুলিও ঘোষণা কৰিছে জিলা উপায়ুক্তগৰাকীয়ে।
