আজি ঘোষণা কৰা হ’ল মহাৰাষ্ট্ৰৰ লগতে ঝাৰখণ্ড বিধানসভা নিৰ্বাচনৰ দিন। মহাৰাষ্ট্ৰত এটা পৰ্যায়তে অনুষ্ঠিত হ’ব নিৰ্বাচন। ২০ নৱেম্বৰত অনুষ্ঠিত হ’ব ভোটগ্ৰহণ। আনহাতে ২৩ নৱেম্বৰত হ’ব ভোটগণনা।
ইফালে ঝাৰখণ্ডত দুটা পৰ্যায়ত অনুষ্ঠিত হ’ব ভোটগ্ৰহণ। ১৩ আৰু ২০ নৱেম্বৰত অনুষ্ঠিত হ’ব নিৰ্বাচন। মহাৰাষ্ট্ৰৰ সৈতে একেলগে ২৩ নৱেম্বৰত হ’ব ফলাফল ঘোষণা।
এই দুখন ৰাজ্যৰ লগতে অসমৰ পাঁচটা সমষ্টিকে ধৰি দেশৰ মুঠ ৪৮টা বিধানসভা সমষ্টি আৰু দুটা লোকসভা সমষ্টিত হ’বলগীয়া উপ-নিৰ্বাচনৰো দিন ঘোষণা কৰে।
অসমৰ পাঁচটা সমষ্টিত হ’বলগীয়া উপ-নিৰ্বাচন এটা দিনতে অনুষ্ঠিত হ’ব। নিৰ্বাচন আয়োগে ঘোষণা কৰা অনুসৰি ১৩ নৱেম্বৰত অনুষ্ঠিত হ’ব ভোটগ্ৰহণ। আনহাতে ২৩ নৱেম্বৰত হ’ব ভোটগণনা।
নিৰ্বাচন আয়োগে ঘোষণা কৰা অনুসৰি, ১৮ অক্টোবৰত উপ-নিৰ্বাচনৰ অধিসূচনা জাৰি কৰা হ’ব। মনোনয়ন দাখিলৰ অন্তিম তাৰিখ ২৫ অক্টোবৰ। আনহাতে মনোনয়ন পৰীক্ষা কৰা হ’ব ২৮ অক্টোবৰত আৰু মনোনয়ন প্ৰত্যাহাৰৰ অন্তিম তাৰিখ ৩০ অক্টোবৰ।
আজি দিল্লীত নিৰ্বাচন আয়োগৰ মুখ্য নিৰ্বাচনী আয়ুক্ত ৰাজীৱ কুমাৰে সংবাদমেলযোগে নিৰ্বাচনৰ দিন ঘোষণা কৰে।
চামগুৰি সমষ্টিৰ কংগ্ৰেছ প্ৰাৰ্থী ৰকিবুল হুছেইনে ধুবুৰী, বিহালীৰ বিজেপি বিধায়ক ৰঞ্জিত দত্তই শোণিতপুৰ, ধলাইৰ বিধায়ক পৰিমল শুক্লবৈদ্যই শিলচৰ, বঙাইগাঁও সমষ্টিৰ অগপ বিধায়ক ফণীভূষণ চৌধুৰীয়ে বৰপেটা আৰু চিদলীৰ এইপিপিএল বিধায়ক জয়ন্ত বসুমতাৰীয়ে কোকৰাঝাৰ লোকসভা সমষ্টিৰ পৰা জয়ী হৈছিল।
