গোলাঘাট জিলাৰ সৰুপথাৰত এক চাঞ্চল্যকৰ ঘটনা সংঘটিত হয়।সকামৰ জলপান খাই বিষক্রিয়াত আক্রান্ত হয় বহু লোক।
এই ঘটনা সংঘটিত হৈছে সৰুপথাৰ সম-জিলাৰ উৰিয়ামঘাট পাঁচঘৰীয়া গাঁৱত। সকামৰ জলপান খাই বিষক্রিয়া হৈ আক্রান্ত হয় বহু লোক। বাতৰি অনুসৰি, উৰিয়ামঘাট পাঁচঘৰীয়া গাঁৱৰ এঘৰ ব্যক্তিৰ ঘৰত শনিবাৰে মাতৃৰ শ্ৰাদ্ধৰ জলপান খোৱাৰ পিছতে অসুস্থ হৈ পৰে বহু লোক। জলপান খাই উৰিয়ামঘাটৰ পাঁচঘৰীয়া, নাওজানৰ কৈৰিগাঁও, বৰপথাৰ, দয়ালপুৰ, তুৰুংগাঁও আদি বিভিন্ন গাঁৱৰ লোক তথা আত্মীয় স্বজন আক্রান্ত হৈছে।
এই সকামত জলপান খোৱা প্ৰায় সংখ্যক লোকেই শৌচ, বমি, পেটৰ বিষ, মুৰৰ বিষ আদি ৰোগত আক্রান্ত হৈ বৰ্তমান সৰুপথাৰৰ সমূহীয়া চিকিৎসালয় আৰু উৰিয়ামঘাট আদৰ্শ চিকিৎসালয়ত ভৰ্তি হৈ আছে।
সৰুপথাৰ সমূহীয়া স্বাস্থ্য কেন্দ্রত বৰ্তমান লৈকে ২২ গৰাকী চিকিৎসাধীন হৈ আছে। স্থানীয় ৰাইজৰ মতে, সকামৰ জলপান হিচাপে দৈ, চিৰা, ক্ৰীম, আদি খাইছিল ভুক্তভোগীয়ে৷
সৰুপথাৰৰ উৰিয়ামঘাট পাঁচঘৰীয়াত সংঘটিত খাদ্যত বিষক্ৰিয়া হৈ পুৰুষ মহিলা শিশুসহ সৰ্বমুঠ ৪১ জন ব্যক্তি আক্ৰান্ত হৈছে৷
আক্ৰান্তসকলৰ খবৰ ল’বলৈ সৰুপথাৰ সমুহীয়া চিকিৎসালয়ত উপস্থিত হয় বিধায়ক বিশ্বজিৎ ফুকন৷চিকিৎসা বিভাগক উন্নত চিকিৎসা আৰু প্ৰশাসনক ঘটনাৰ তদন্ত কৰাৰ নিৰ্দেশ দিয়ে বিধায়কজনে৷
আক্ৰান্তসকলৰ ২২ গৰাকীক সৰুপথাৰ সমূহীয়া স্বাস্থ্য কেন্দ্রত, ১৮ গৰাকীক উৰিয়ামঘাট আদৰ্শ চিকিৎসালয়ত আৰু ২ গৰাকীক উন্নত চিকিৎসাৰ কাৰণে গোলাঘাটলৈ প্ৰেৰণ কৰা হয়৷
