ৰাজস্থানৰ ঢোলপুৰ জিলাৰ বাড়ী সদৰ থানা এলেকাত শনিবাৰে নিশা সংঘটিত হোৱা এক শোকাৱহ পথ দুৰ্ঘটনাত একেটা বংশৰে ৮টা শিশুৰ মৃত্যু হোৱাত সমগ্ৰ অঞ্চলটোতে এক অভাৱনীয় পৰিৱেশৰ সৃষ্টি হৈছে। এই দুৰ্ঘটনাত মুঠ ১২ জন লোকৰ কৰুণ মৃত্যু হয়।
মৃতসকলৰ ভিতৰত আছে আঠটি শিশু, তিনিগৰাকী মহিলা আৰু এজন পুৰুষ। এই ১২ জন লোকৰ ভিতৰত ৫জন একেটা পৰিয়ালৰ। দুৰ্ঘটনাটোত তেওঁলোকৰ পৰিয়ালটোৰ আটাইকেইজন সদস্যৰে মৃত্যু হয়।
আৰক্ষীৰ মতে, শনিবাৰে নিশা প্ৰায় ১২ বজাত ঢোলপুৰ-কৰৌলি ঘাইপথৰ সুনিপুৰ গাঁৱৰ সমীপত এই দুৰ্ঘটনা সংঘটিত হয়। দুৰ্ঘটনাত পতিত হোৱা লোকসকল বাড়ী চহৰৰ গুমাটৰ বাসিন্দা।
জানিব পৰা মতে, এইসকল লোকে ওচৰৰ গাঁৱৰ এখন পাৰিবাৰিক অনুষ্ঠানত অংশগ্ৰহণ কৰিবলৈ এখন অটোত উঠি গৈছিল। অনুষ্ঠানৰ পৰা উভতি আহি থাকোতে তেওঁলোকৰ অটোখনে এখন শ্লীপাৰ বাছৰ সৈতে সংঘৰ্ষত লিপ্ত হয়।
দুৰ্ঘটনাটোত আঠটি শিশু আৰু অটোখনৰ গৰাকী ইৰফানৰ সৈতে দুগৰাকী মহিলাৰ থিতাতে মৃত্যু হয়। গুৰুতৰভাৱে আহত হয় এটি শিশু আৰু এগৰাকী মহিলা। আৰক্ষীয়ে তেওঁলোকক চিকিৎসালয়লৈ লৈ যায় যদিও মহিলাগৰাকীও হাস্পতালত মৃত্যুক সাৱটি লয়।
ইফালে গুৰুতৰভাৱে আহত শিশুটিক আগ্ৰাৰ এখন হাস্পতাললৈ প্ৰেৰণ কৰা হৈছে। অটোখনত থকা যাত্ৰীসকলৰ ভিতৰত একমাত্ৰ লএই শিশুটিৱে জীয়াই আছে।
উল্লেখ্য যে, এই দুৰ্ঘটনাত মৃত্যু হোৱা আটাই কেইগৰাকী লোকৰে পৰিয়াল তথা আত্মীয়লৈ মুখ্যমন্ত্ৰীৰ সাহায্য পুঁজিৰ পৰা ২ লাখ টকাকৈ আৰ্থিক সাহায্য প্ৰদানৰ কথা ঘোষণা কৰিছে প্ৰশাসনে।
