উত্তৰাখণ্ডৰ চামোলীৰ ট্ৰেড ব’ৰ্ডে ১৫টা মুছলমান পৰিয়ালে চামোলী এলেকা এৰি যাব লাগিব বুলি প্ৰস্তাৱ গৃহীত কৰিছে। এই সন্দৰ্ভত AIMIMৰ সাংসদ আছাদুদ্দিন ওৱেইচীয়ে প্ৰধানমন্ত্ৰী নৰেন্দ্ৰ মোদীৰ বিৰুদ্ধে সৰৱ পৰিছে।
মুছলমান বিষয়ক লৈ পুনৰ প্ৰধানমন্ত্ৰী নৰেন্দ্ৰ মোদীক প্ৰশ্ন উত্থাপন কৰিছে সৰ্বভাৰতীয় মজলিছ-ই-ইত্তেহাদুল মুছলিমিন (AIMIM)ৰ মুৰব্বী তথা হায়দৰাবাদৰ লোকসভাৰ সাংসদ আছাদুদ্দিন ওৱেইছিয়ে।
২০ অক্টোবৰ, ২০২৪ অৰ্থাৎ দেওবাৰে ছ’চিয়েল মিডিয়া প্লেটফৰ্ম এক্সত এটা পোষ্টৰ জৰিয়তে তেওঁ অভিযোগ কৰে যে, ভাৰতত মুছলমানসকলক অস্পৃশ্য কৰি তোলা হৈছে।
আছাদুদ্দিন ওৱাইছিয়েও মাইক্ৰ’ ব্লগিং প্লেটফৰ্মত এটা পোষ্টত দাবী কৰে যে, উত্তৰাখণ্ডৰ চামোলীত ১৫টা মুছলমান পৰিয়ালক গণ বৰ্জন কৰা হৈছে। ৩১ ডিচেম্বৰৰ ভিতৰত মুছলমানসকলে চামোলী এৰি যাব লাগিব বুলি ভাবুকি প্ৰদান কৰিছে চামোলীৰ ব্যৱসায়ীসকলে। যদি কোনো ঘৰৰ মালিকে মুছলমানক ঘৰভাড়াও দিয়ে, তেন্তে ১০ হাজাৰ টকাৰ জৰিমনা ভৰিব লাগিব।
আছাদুদ্দিন ওৱাইছিয়ে কয় যে, এইখন ,সেই একেখনেই উত্তৰাখণ্ড, য’ত চৰকাৰে সমতাৰ নামত ইউনিফৰ্ম চিভিল কোড (ইউচিচি) ৰূপায়ণ কৰি আছে। চামোলীৰ মুছলমানসকলৰ সমতাৰে জীয়াই থকাৰ অধিকাৰ নাই নেকি বুলি তেওঁ প্ৰধানমন্ত্ৰী নৰেন্দ্ৰ মোদীক প্ৰশ্ন উত্থাপন কৰে। লগতে তেওঁ নৰেন্দ্ৰ মোদী ভাৰতৰহে প্ৰধানমন্ত্ৰী, ডুবাই বা ছৌদি আৰৱৰ নহয়। গতিকে তেওঁ যদি আৰব শ্বেখক সাৱটি ধৰিব পাৰে, তেন্তে চামোলীৰ মুছলমানকো সাৱটি ধৰিব পাৰে।
সমগ্ৰ ঘটনাটো কি?
দৰাচলতে উত্তৰাখণ্ডৰ চামোলীৰ খানছাৰ টাউনত ব্যৱসায়ীৰ এটা সংগঠনে নিয়মাৱলী কৰিছে। এই প্ৰস্তাৱ অনুসৰি এই অঞ্চলত বসবাস কৰা ১৫টা মুছলমান পৰিয়ালক ৩১ ডিচেম্বৰৰ ভিতৰত অঞ্চলটো এৰি যাবলৈ নিৰ্দেশ দিয়া হৈছে। যদি তেওঁলোকে নিৰ্দিষ্ট সময়ৰ ভিতৰত ঘৰ খালী নকৰে, তেন্তে তেওঁলোকৰ বিৰুদ্ধে আইনী ব্যৱস্থা গ্ৰহণ কৰা হ’ব। কোৱা হৈছে যে, এই অঞ্চলত বহু মুছলমান পৰিয়ালে দশক দশক ধৰি বাস কৰি আহিছে। উত্তৰাখণ্ডৰ ৰাজধানীৰ পৰা ২৬০ কিলোমিটাৰ নিলগত এই অঞ্চল চামোলী নামেৰে জনাজাত।
উল্লেখ্য যে, উত্তৰাখণ্ড চৰকাৰে নিৰ্দেশনা দিয়ে যে, ৩১ ডিচেম্বৰৰ ভিতৰত ১৫টা মুছলমান পৰিয়ালে ত্যাগ কৰিব লাগিব চহৰখন। গতিকে UCC কাৰ্যকৰী কৰিব বিচৰা উত্তৰাখণ্ডত কিয় এনেধৰণৰ ঘটনা সংঘটিত হ’বলৈ পাইছে বুলি প্ৰশ্ন উত্থাপন কৰে আছাদুদ্দিন ওৱেছিয়ে।
