অৱশেষত গুৱাহাটীলৈ অনা হ’ল দীপাংকৰ বৰ্মনক। ট্ৰেডিঙৰ নামত হাজাৰ হাজাৰ কোটি টকা লুন্ঠন কৰা ডি বি ষ্টকৰ স্বত্বাধিকাৰী দীপাংকৰ বৰ্মনক শেহতীয়াকৈ অসম আৰক্ষীয়ে গোৱাত গ্ৰেপ্তাৰ কৰিছে।
ট্ৰেডিঙৰ নামত প্ৰায় ৭০০০ কোটি টকা লুণ্ঠন কৰি গোৱাত আত্মগোপন কৰি আছিল দীপাংকৰে। দেওবাৰে এই মহাপ্ৰৱঞ্চকটোক গোৱাত গ্ৰেপ্তাৰ কৰাৰ পাছতেই বিমানেৰে অসমলৈ অনাৰ কথা আছিল যদিও বিমানৰ টিকট নথকাৰ বাবে মঙলবাৰে অসমলৈ লৈ অনা হ’ল ধৃত প্ৰৱঞ্চকটোক।
মঙলবাৰে নিশাৰ ভাগত বৰঝাৰ বিমান বন্দৰত উপস্থিত হয় দীপাংকৰ। দীপাংকৰক বিমান বন্দৰৰ পৰা পাণবজাৰ আৰক্ষী থানালৈ লৈ অনা হয়। বগা ৰঙৰ ইন’ভা বাহনেৰে লৈ আনে দীপাংকৰক।
গোৱাত গ্ৰেপ্তাৰ কৰাৰ পাছতেই দীপাংকৰৰ কোঠাত আৰক্ষীয়ে তালাচী চলায়। এই তালাচীত আৰক্ষীয়ে নগদ লাখ লাখ টকাৰ লগত সোণৰ বহু আ-অলংকাৰ আৰু পাৰ্চপৰ্টো জব্দ কৰে।
অতিৰিক্ত আৰক্ষী আয়ুক্ত অমিত মাহাতোৰ নেতৃত্বত চলা এই অভিযানত আৰক্ষীয়ে মহাপ্ৰৱঞ্চক দীপাংকৰ বৰ্মনৰ ওচৰত নগদ ২৭লাখ ৬হাজাৰ ৭৫০টকা জব্দ কৰে। গোৱাৰ পানজিমৰ পৰা গ্ৰেপ্তাৰ কৰা দিপাংকৰ বৰ্মনক আজি আদালতত হাজিৰ কৰোৱা হ’ব।আৰক্ষীয়ে দীপাংকৰক নিজৰ জিম্মাত বিচৰাৰ পূৰ্ণ সম্ভাৱনা আছে।
